Өфөлә егерменән ашыу боҙ ҡаласығы ҡалҡып сыҡты. Уларҙағы ҡупшы шыршы, гәлсәр һындар, хушты алырлыҡ һырғалаҡтар тирәһендә балаларҙың һәм өлкәндәрҙең ихлас көлөүе тынмай. Һеҙҙе лә, ҡәҙерле уҡыусыларыбыҙ, шау-гөр килгән ҡайһы бер майҙансыҡтар буйлап сәйәхәткә саҡырабыҙ.
Ленин майҙанында тауҙан шыуып төшөү менән катокка барып эләктек. Конькиҙа йөрөргә яратыусылар өсөн быйыл ошондай бүләк яһағандар. Бушлай катокка ҡаланың төрлө мөйөшөнән киләләр. Шыршыны ике яҡтан һаҡлап ятыусы аждаһалар һәм башҡа боҙло һындар янында һәммәһе фотоға төшөргә ашыға.
“Өфө” универмагы эргәһендәге майҙанда ауыл мөхитенә юлыҡтыҡ. Ҡаланың 2-се художество мәктәбе уҡытыусылары Азамат Ғарипов, Салауат Ғиләжетдинов, Рәмил Ғәйфуллин “Ауыл күренештәре” композицияһын ижад иткән. Балыҡсы малай, милли кейемдәге әбей менән бабай, лабиринт рәүешендә эшләнгән мал-тыуар һарайы, ҡарлы сәскә эргәһенән тиҙ генә үтеп китеп булмай, уларға ҡарап, бер аҙға яҡты хәтирәләргә бирелге килә. Октябрь проспекты буйында һуҙылып төшкән аждаһа тинлектәр менән ҡапланып бөткән. Баҡтиһәң, өфөләр ырым уйлап сығарған: аждаһа һынына аҡса йәбештерһәң, йыл мул киләсәк, имеш.

Ярата ул Яңы йыл байрамын. Мөғжизәле, сихри төн уның бөтә хыялдарын тормошҡа ашырыр, барлыҡ теләктәрен ҡабул ҡылыр төҫлө. Эх, Ҡыш бабай булһамы, бөтә кешелеккә сәләмәтлек, шатлыҡ-ҡыуаныстар ғына өләшер ине бит ул. Хәйер, Хоҙай Тәғәлә әңгәмәсемдән Ҡыш бабайҙың йомартлығын, Ҡарһылыуҙың һылыулығын, ҡыш айының саялығын йәлләмәгән. Яңы йыл байрамы алдынан гәзит уҡыусыларыбыҙға ла уның матур теләктәрен юллайбыҙ. Һүҙ — Башҡортостан Республикаһының Дәүләт Йыйылышы — Ҡоролтай Рәйесе урынбаҫары Лилиә ҒҮМӘРОВАҒА.
— Лилиә Салауат ҡыҙы, белеүебеҙсә, Ҡуян йылы һеҙҙең тормошоғоҙға яңынан-яңы яуаплыраҡ, мөһимерәк “биттәр” өҫтәне. Ап-аҡ ҡына, йомшаҡ ҡына булһа ла, үтә ҡурҡаҡ хайуандың сифаттары был үрҙәрҙе яулағанда ҡамасауламанымы һуң?
— 2011 йыл, ысынлап та, ниндәйҙер кимәлдә хеҙмәтемә һынау осоро булды. Башҡортостан Республикаһының Дәүләт Йыйылышы — Ҡоролтай депутаты итеп һайланыуым да хеҙмәт кенәгәмдәге яҙыуҙы ғына түгел, булмышымды ла ҡырҡа үҙгәртте.

“Башҡортостан Республикаһында күп балалы ғаиләләргә дәүләт ярҙамы тураһында”ғы Законға ярашлы, Баймаҡ районынан күптән түгел биш ғаилә республика бюджеты иҫәбенән торлаҡ сертификатына эйә булды. Биш һәм унан да күберәк бәлиғ булмаған йәштәге бала тәрбиәләүсе ғаиләләрҙең торлаҡ шарттарын яҡшыртыуға йүнәлтелгән программа буйынса уларға социаль түләүҙәр бирелә, ә уны алыу хоҡуғы торлаҡ сертификаты менән нығытыла.
Ошондай ҙур бүләккә эйә булыусы бәхетле парҙарҙың береһе Баймаҡ районының Күсей ауылында йәшәй. Раушания менән Дәүләт Ишбирҙиндарҙың татыу ғаиләһендә сәскәләй дүрт ҡыҙ һәм бер ул тәрбиәләнә. Бер-бер артлы донъяға килгән балаларҙы тәрбиәләү мәшәҡәте, ауылда хеҙмәт хаҡы түләнгән эш булмау сәбәпле, тиҙ арала йорт төҙөү хаҡында хыяллана ла алмайҙар. Ишбирҙиндар 2009 йылда үрҙә әйтелгән программала ҡатнашыу өсөн кәрәкле документтарҙы юллап, тейешле органдарға ебәрә. Ниһайәт, көткән өмөттәре аҡлана, сертификат алыу бәхетенә ирешәләр.

Байрамда кәйефегеҙ күтәренке булһын, матур башланған кисәгеҙҙең йәме китмәһен өсөн иң мөһиме нимә? Берәүҙәр, һуңғы модаға ярашлы кейем, эргәңдә һөйгәнең йәки йән тартҡан дуҫтарың, ҡәҙерле туғандарың менән осрашыу йәки табындаштарыңдың күңел көрлөгө, мәжлесте ҡыҙыҡлы итә белеүе, тиер. Ә ҡышҡы төндә теге йәки был сәбәп менән һалҡында ҡалып, аяҡ-ҡулыңды өшөтмәү, тағы ла яманырағы — туңдырыу хәүефе барлығын да онотмау хәйерле. Күңелһеҙ һәм ауыр хәлгә тарымайым тиһәгеҙ, иҫкәртеүҙәргә, кәңәштәргә күҙ һалыу зыян итмәҫ.
* Үтә ныҡ һалҡында урамға йәки юлға сығыуҙан тыйылып тороғоҙ.
* Сәфәрегеҙ кисектергеһеҙ икән, тәбиғәт ҡырыҫлығына ҡарап кейенегеҙ. Эске кейемдең йылы, ҡалын булыуы мотлаҡ. Пальто йәки тундың оҙонорағы, йөн ойоҡбаш һәм табанына олтораҡ һалынған аяҡ кейеме ышаныслы, ти табиптар.
* Алҡа, йөҙөк, сылбыр һәм беләҙекте өйҙә ҡалдырып тороу яҡшы.
* Бит һәм муйын өшөмәһен өсөн йөн шарф һәм свитер кейеү һәйбәт.

Свердловск өлкәһендә тыуып үҫкән Борис Камалетдиновтың Өфөгә килеп төпләнеүе осраҡлы түгел. Ни тиһәң дә, уның нәҫел-нәсәптәренең еп осо республикабыҙға килеп тоташа. Танышымдың өләсәһе Борай районының Иҫке Ҡарағош тигән башҡорт ауылында ғүмер иткән икән.
Әңгәмәсем Яңы йылдан нимәләр көтә? Ошо хаҡта ҡыҙыҡһындыҡ. Борис Сәләм улының аждаһаны уҫал тип иҫәпләүселәргә әйтер фекере бар.
– Тормош үҙенсәлекле ҡоролған, ләкин һәр кем ояһын үҙенсә үрә, – тип башланы һүҙен Борис Камалетдинов. – Шәхсән миңә килгәндә, бәләкәйҙән табип булыу теләге менән яндым. Өләсәйемдең быуын ултыртыу, имләү, тәнде һылау-һыйпау кеүек һәм башҡа яҡшы һәләттәрен күреп үҫеү ҙә быға булышлыҡ иткәндер. Шифалы ҡулдары кемдәрҙе генә аяҡҡа баҫтырманы икән?! Йыш ҡына ауыл буйлап "сәфәр"гә мине лә үҙе менән бергә ала торғайны. Етмәһә, арҡамдан тупылдатып һөйөп, "минең бәпкәм ҙур үҫкәс, духтыр була", тип һәр саҡ ҡанатландырып торҙо.