Башҡортостан Президенты Рөстәм Хәмитов Асҡын районына сәфәре барышында социаль өлкә объекттарын тикшерҙе һәм биләмәнең социаль-иҡтисади үҫеше мәсьәләләре буйынса күсмә кәңәшмә үткәрҙе.
Район үҙәгендә Рөстәм Хәмитов мәҙәниәт һәм ял паркы төҙөлгән урынды ҡараны, уның проекты менән танышты. Президент парк булдырыу башланғысын хупланы, Асҡын йылдам үҫә һәм халыҡҡа ял өсөн уңайлы урын кәрәк, тип билдәләне.
Унан һуң Рөстәм Хәмитов 160 урынға иҫәпләнгән яңы балалар баҡсаһы төҙөлөшө менән танышты. Мәктәпкәсә мәғариф учреждениеһын августа сафҡа индереү күҙаллана.
Урындағы хакимиәт вәкилдәре әйтеүенсә, мәктәпкәсә учреждениеларҙа урын етешмәй, тағы ла 300-ҙән ашыу бала сиратта тора.
Асҡын ауылында Рөстәм Хәмитов шулай уҡ үҙәк район дауаханаһында булды. Һаулыҡ һаҡлау учреждениеһы етәкселәре әйтеүенсә, табиптар менән тәьмин ителеү бында ни бары 63 процент тәшкил итә.
Шулай уҡ дауахана ҡаласығындағы бер бина 1887 йылда төҙөлгән. Ошоға бәйле майҙандарҙы киңәйтеү проекты әҙерләнеп, унда 60 урынға яңы дауалау корпусы төҙөү күҙаллана.

Башҡортостандың баш ҡалаһы өс йыл эсендә Рәсәйҙең косметика үҙәгенә әүереләсәк, беҙҙә етештерелгән продукция ватан һәм сит ил баҙарының байтаҡ өлөшөн яулаясаҡ. “РОСНАНО” асыҡ акционерҙар йәмғиәте менән Рәсәй венчур компанияһы Өфөлә барлыҡҡа килгән “НаноДерм-профи” яуаплылығы сикләнгән йәмғиәтенә ошондай оло өмөт бағлай. “НаноДерм-профи”ҙың директорҙар советы рәйесе, биология фәндәре докторы Александр Земницкийҙың күп йыллыҡ ғилми тикшеренеүҙәре һәм ҡаҙаныштары быға нигеҙ бирә.
“Нано-” ҡушымтаһы хәҙер күп һүҙҙәрҙә осрай: нанокосметика, нанофизика, нанометалл... Бер бөтөндөң миллиардтан бер өлөшөн аңлатыусы “нано” һүҙе боронғо грек теленән “кәрлә” тип тәржемә ителә. Барлыҡ нанотехнологиялар 100 нанометрға тиклем ҙурлыҡтағы микрокиҫәксәләр алыуға ҡоролған. Бөгөн был йүнәлештәге асыштар төрлө өлкәлә уңышлы файҙаланыла. Ҡайһы бер бай фантазиялы ғалимдар, нанотехнологиялар үлемһеҙлеккә юл аса, тип ышандыра. Һәр хәлдә Александр Земницкий һәм уның командаһы кешенең тышҡы ҡиәфәтен 5-10 йылға йәшәртеүгә өлгәшкән дә инде.

Ашығып, йүгерә-атлай эштән ҡайтып барам. Октябрь проспектындағы ер аҫты юлынан сығыуыма ҡулыма гәзит тотторҙолар: аптырарға түгел, кеше күп йөрөгән урынды реклама таратыу өсөн оҫта файҙаланалар. Ярайһы ғына тос төҫлө баҫманың башына күҙ һалыу менән аптырап киттем: “МММ-2011” тип яҙылған! Бәй, был бит заманындағы данлыҡлы финанс пирамидаһының билдәһенә оҡшаш, берәй шаяртыумы әллә тип торам. Юҡ икән! Баҡһаң, ысынлап та, миллиондарса якташыбыҙҙы “тишек кәмәгә” ултыртҡан Сергей Мавроди тағы ла эшмәкәрлеген йәйелдереп ебәргән. Ә ундағы вәғәҙәләр! Бер һумды йөҙ һум итеп ҡайтарам, тип ышандырыу өсөн телмәр оҫталығын да, йәнгә үтеп инерлек миҫалдарҙы ла файҙаланғандар! Тимәк, бәғзеләр халыҡты һаман да томана тип иҫәпләй, уны күрәләтә төп башына ултыртырға ниәтләй...

Тауҙар нисек барлыҡҡа килә? Йәйғор буйлап йүгереп үтеп буламы? Бесәйгә ни өсөн мыйыҡ кәрәк? Нимә яҡшы, нимә насар?.. Бәләкәстәрҙең һорауҙары шундай күп, яуап биреп кенә өлгөр! Хәйер, беҙҙең бит “Юлдаш” радиоһында ҙур ярҙамсыбыҙ — “Иләү” тапшырыуы бар!
Бында бәләкәстәр тап ошондай һорауҙарға яуап эҙләй. Һүҙгә килешеп, үпкәләшеп тә алалар, һә тигәнсә ярашып та өлгөрәләр. Донъяны танып белеү еңел түгел шул.
Дуҫтар, ә һеҙ “Иләү” тапшырыуының хәҙер инде “ҙур үҫкән” “Тамыр” балалар һәм үҫмерҙәр телеканалына нигеҙ һалғанын беләһегеҙме? Ысынлап та, 1989 йылдың 1 июнендә радиола “Иләү”ҙең беренсе сығарылышы яңғырай, “Тамыр” тарихының тәүге бите ана шулай асыла. Барыһы ла ҡыҙыҡһыныуҙан башлана шул. Ғәмһеҙ булырға ярамай, эйеме, дуҫтар?

Күңелле ҡышҡы каникул үтеп тә китте. Уны һағынып иҫкә алабыҙ.
Ял ваҡыты булыуға ҡарамаҫтан, беҙҙең мәктәп шау-гөр килеп торҙо. Волейбол, минифутбол, шашка, шахмат ярыштары үткәрелде. Иң бәләкәстәр беҙ яһаған тауҙан шыуып кинәнде. Ҡыш бабай, Ҡарһылыу, аждаһа, ҡуяндың боҙҙан эшләнгән һындары араһында рәхәтләнеп уйнанылар. Каникулыбыҙҙы күңелле үткәргән өсөн мәктәп уҡытыусыларына, балалар баҡсаһы тәрбиәселәренә ҙур рәхмәт!