Өфөнөң Спорт һарайы бөгөн ҙур төҙөлөш майҙанын хәтерләтә. Ни тиһәң дә, республикабыҙҙың баш ҡалаһында үтәсәк Йәш хоккейсыларҙың донъя чемпионатына һанаулы ғына көндәр ҡалды. Декабрь аҙағында “Өфө-Арена” менән берлектә был боҙ һарайы ла Ер шарының төрлө илдәренән йыйылған командаларҙы һәм уларҙың тоғро көйәрмәндәрен ҡабул итәсәк. Шуға күрә беҙ ҙә унда барған төҙөлөш менән яҡындан танышырға булдыҡ.
Әлеге мәлдә “Өфө-Арена” халыҡ-ара турнирға тулыһынса әҙер тиерлек. Бөгөн Спорт һарайын реконструкциялау эштәре лә аҙағына яҡынлаша. Төҙөлөш тамамланыуға Өфөлә юғары кимәлдә ярыштар үткәрерлек һәм көйәрмәндәр өсөн бөтөн мөмкинлектәре булған тағы бер арена барлыҡҡа киләсәк. Донъя чемпионатында Швеция, Чехия, Финляндия, Швейцария, Латвия йыйылма командалары ҡатнашасаҡ.

Иртәгә Өфөлә Швецияның виза үҙәге асыла, тимәк, был илгә барырға теләүселәргә башҡаса документ артынан Мәскәүгә йөрөргә кәрәкмәйәсәк. Республика менән Балтик диңгеҙе буйындағы ил араһындағы бәйләнештәрҙе нығытыусы саралар бының менән генә сикләнмәй. 5 – 9 сентябрҙә уҙасаҡ Швеция Короллеге көндәре ваҡиғаларға бай булмаҡсы.
Швеция илселегенең иҡтисад мәсьәләләре буйынса советнигы Томас Халльбергтың әйтеүенсә, Рәсәй ҡалаларында Швеция Короллеге көндәре бер нисә йыл ойошторола, ә Өфөлә сараны тәүге тапҡыр уҙғаралар.
— Рәсәйҙә 300-ҙән ашыу швед компанияһы эшләй. Улар нигеҙҙә Мәскәү, Санкт-Петербург ҡалаларында тупланған. Маҡсатыбыҙ — бизнесыбыҙҙы илдең башҡа төбәктәрендә йәйелдереү. Башҡортостанда үҫешер өсөн мөмкинлектәр бар, — тине ул журналистар менән осрашыуҙа.

Өҫтөнлөклө инвестиция проекттары буйынса Хөкүмәт комиссияһының сираттағы ултырышын Башҡортостан Президенты Рөстәм Хәмитов алып барҙы.
Республика етәксеһенең әйтеүенсә, тәүге ярты йыллыҡ һөҙөмтәләре буйынса инвестиция әүҙемлеге артыуы һәм күрһәткестәрҙең яҡшырыуы күренә. Төп капиталға барлыҡ финанслау сығанаҡтарынан ошо ваҡыт эсендә 80 миллиард һум аҡса ингән. Уртаса үҫеш Рәсәй буйынса 111 процент булһа, беҙҙә — 122,5 процент.
— Республиканың Иҡтисади үҫеш министрлығы яһаған күҙаллауға ярашлы, йыл аҙағына инвестиция күләме 230 миллиард һум тәшкил итәсәк, — тине Рөстәм Хәмитов.

Рәсәй Федерацияһы Социаль страховка фондының Башҡортостан буйынса төбәк бүлексәһе ярты йыллыҡ эш һөҙөмтәләренә йомғаҡ яһаны. Кәңәшмәлә шулай уҡ өр-яңы бурыстар, уларҙы хәл итеү юлдары билдәләнде.
Быйыл да страховкалаусыларҙың бурыстарын түләтеү буйынса ҡатмарлыҡтар булыуына ҡарамаҫтан, Фондтың эшен ыңғай баһаларға мөмкин. Барыһы ла сағыштырыуҙа күренә. 2011 йылда страховка иғәнәләренә идара итеүҙә һәм средстволарҙы тотоноуҙа яҡшы күрһәткестәргә өлгәшелһә, быйыл да уңыштар ҡыуандырырлыҡ.
2012 йылдың тәүге яртыһында страховкалауҙың бөтә төрҙәре буйынса иғәнәләр туплау коэффициенты үткән йылдың ошо осоро менән сағыштырғанда күтәрелгән.

Алтын ҡуллы ине Илдарҙың олатаһы. Талдан “һә” тигәнсә кәрзинен дә үрә, ҡайын туҙынан тырыз яһай, йүкәнән һауыт-һаба, хужалыҡ кәрәк-ярағы эшләй ине.
Малай кескәй саҡтан уҡ олатаһы янында сыуалды, ярҙамлашырға тырышты. Оҫталығы менән тирә-йүнгә даны таралған ҡартҡа күберәк арба, сана яһау үтенесе менән киләләр ине. Ләкин Илдарҙы иң таң ҡалдырғаны — олатаһының ағас һырлау оҫталығы. Йортона инһәң дә һатып алынған һис бер әйбер күрмәҫһең: шкаф, карауат, һауыт-һаба тиһеңме — барыһы ла үҙ ҡулы менән эшләнгән. Өс йәштә сағында олатаһы бүләк иткән ҡурсаҡты һеңлеһе бөгөн дә һаҡлай...
Бәләкәйҙән үк олатаһы кеүек оҫта булырға хыялланды Илдар. Мәктәпкә уҡырға ингәс, хыялы ысынбарлыҡҡа әүерелде — Максим урта мәктәбендә хеҙмәт дәресе уҡытыусыһы уларҙы ағас һырлау, семәрләү серенә өйрәтте. Уҡытыусыһы Булат Әхмәтғәлиев ысын мәғәнәһендә теләһә ниндәй ағас киҫәгенә “йән өрөп”, унан береһенән-береһе матурыраҡ төрлө һауыт-һаба, кеше, хайуан һындары яһай белеүсе “тылсымсы” ине.

2012 йыл иҫтәлеге
1
Рәсәй яна.
Уның менән бергә
Башҡортостан яна ут булып.
Йәй үтмәҫтән шиңгән япраҡтарға
Тамғы килә күктән һут булып.

Ҡурсалағы килә дым юҡлыҡтан
Шатыр-шотор янған урманды.
Әммә ҡайҙан алырға һуң ерҙе
Уттан араларлыҡ дарманды?!

“Башҡортостан”-Йома” гәзитенең 31 августағы 170-се һанында “Юрист кәңәштәре” рубрикаһында “Кандидат иткеләре килмәй” тигән баш аҫтында Ейәнсура районынан гәзит уҡыусының муниципаль һайлауҙа кандидаттар күрһәтеү срогы тураһындағы һорауына яуап баҫылып сыҡҡан.

Лондондағы Паралимпия уйындарында Башҡортостан спортсылары Рәсәй иҫәбенә миҙалдар алыуын дауам итә.

1 сентябрҙән “Балаларҙы сәләмәтлегенә һәм үҫешенә зыян килтергән мәғлүмәттән һаҡлау тураһында” Федераль закон үҙ көсөнә инде. Ул, йәш тамашасыларҙың йәшен иҫәпкә алып, һәр тапшырыуға махсус тамға (“0+”, “6+”, “12+”, “16+”, “18+”) ҡуйыуҙы талап итә. Яңы Законға ҡарата ниндәй фекерҙәһегеҙ?

1 сентябрҙән киләһе йылдың тәүге яртыһына матбуғатҡа яҙылыу башланды. Башҡортостандағы барлыҡ почта бүлексәләрендә үҙегеҙ теләгән гәзит, журналға яҙыла алаһығыҙ. Дүрт йыл дауамында тарифтарҙы үҙгәрешһеҙ һаҡлап ҡалғанға күрә, республика буйынса баҫмаларҙың тиражы быйылғы кимәлдә ҡаласаҡ, тип фаразлана.
Башҡортостандың Федераль почта элемтәһе идаралығы директоры Ирек Ғәлимов әйтеүенсә, төбәк халҡы ҡағыҙҙағы матбуғатҡа тоғро ҡала. Тәүге ярты йыллыҡта ғына республика почтальондары уларға 42 миллион дана гәзит, журнал, китап продукцияһы еткергән.