Эшкә килеүселәр өсөн ошо араны үтеү оло бер михнәткә әүерелә. Аяҡ аҫтын ҡарап атларға, ҡолап имгәнеп ҡуймаҫҡа тырышаһың. Юл ситенән барыр инең, унда машиналар тығылышҡанлыҡтан, тәгәрмәс аҫтында ҡалыуың ихтимал. Өфөнөң бер ситендәге түгел, ә ҡаланың үҙәгендә, дөрөҫөрәге, Матбуғат йорто ҡаршыһындағы күренешкә ҡағыла был.
Шәһит Хоҙайбирҙин һәйкәле (ҡыҙғанысҡа ҡаршы, ошоға тиклем яҙыуы булмағас, кемгә ҡуйылғанын бик һирәктәр генә белә) майҙанында төҙөкләндереү эше күптән башланғайны, әле булһа осона сыға алмайҙар. Эшләүен эшләйҙәр ҙә ул, тик бик һүлпән ҡыбырлайҙар. Ҡайһы саҡ эшселәр пәйҙә булып ҡала, ләкин күберәк тик ултырғандарын күрәбеҙ. Әллә көҙгө ямғырҙарҙы көттөләрме икән? Бына хәҙер көн дә яуа, аяҡ аҫты бысраҡ, эшләй ҙә алмайҙар.
Бер ҡараһаң, әллә ни ҙур объект та түгел һымаҡ, әммә эш оҙаҡҡа һуҙылды.

Хәҙер ҡала баҙары һәм магазиндарынан аҙыҡ-түлек алһаң, икеләнмәйенсә ашап булмай: ҡыяр менән помидорҙың ысын тәме лә, еҫе лә тойолмай; иттән аш бешерһәң, тоҙлоғо юҡ; картуфы ла картуфҡа оҡшамаған. Ошондай химикатлы ризыҡтан тамам биҙгән өфөләр йыл да көҙгө йәрминкәләрҙе түҙемһеҙләнеп көтөп ала. Ауыл уңғандары менән ҡала халҡы, ниһайәт, уҙған ял көндәрендә егермегә яҡын йәрминкә майҙанында осрашты.
Ауыл хужалығы продукцияһының ни тиклем танһыҡ икәнлегенә Серго Орджоникидзе исемендәге майҙанда инандыҡ. Кушнаренко районының Иҫке Ҡормаш ауылынан Фирүзә менән Йәнис Вахитовтар алып килгән бер баш тана итен ике сәғәттә үк һатып бөтөп ҡайтырға йыйына ине.
— Иттең килограмын, һөйәкле йә һөйәкһеҙ булыуына ҡарап, 200 — 240 һумдан һаттыҡ. 30 мең һум килем алдыҡ, — тине хужабикә.

Йылайыр районында сыҡҡан янғындан һигеҙ ғаиләнең йортһоҙ ҡалыуы тураһында беҙҙең гәзит хәбәр иткәйне инде. Республика Президенты Рөстәм Хәмитов уларға тиҙ арала торлаҡ төҙөү тураһында күрһәтмә биргәйне.
Әле Йылайыр ауылында төҙөлөш эштәре бара. “Термохольц” яуаплылығы сикләнгән йәмғиәте йорттар һала. Яңы урам өсөн урынды Һаҡмар йылғаһы буйында һайлау юҡҡа түгел. Янғында көл-күмергә әйләнгән өйҙәр тап ошонда урынлашҡан булған икән. Шуға күрә район етәкселеге яңы һалынасаҡ урамды элеккеһенә оҡшатып төҙөргә ҡарар итә.
Ике хужа иһә элекке урындарында йорт төҙөүҙе үтенгән. Уларҙың теләген иҫәпкә алып, бөгөн йорт шул ерҙә күтәрелә.

Һыу ҡәҙере Ер йөҙөндә эсәр һыу бөткәс беленер
Ер йөҙөндә эсәр һыу кәмегән, шишмәләр ҡороған, йылғалар һайыға барған һайын кешелек донъяһы һыу тураһында күберәк уйлана. Һыуға бәйле төрлө катаклизмдар һәр кемде хәүефкә һала. Күренекле ғалимдар һыу серҙәрен хәҙер бөйөк Раббыбыҙҙың ергә ебәргән изге Ҡөрьәненән эҙләй. Шулай уҡ быуаттар төпкөлөнән килгән халыҡ аҡылына ла мөрәжәғәт итә. Борон: «Ахырызаман етһә, кешенән һыу ҡасыр», – тиер булғандар. Быйылғы ҡоролоҡ, шишмәләрҙең юҡҡа сығыуы, ҙур йылғаларҙың кисеп сығырлыҡ булып һайығыуы боронғолар һүҙен раҫлай түгелме?
Ғүмер сығанағы
Һыу!.. Аллаһы Тәғәләбеҙҙең кешелек донъяһына биргән иң ҙур хазинаһы ул. Был мөғжизә ни бары өс хәрефтән генә тора. Тәү ҡарашҡа яп-ябай һүҙ, ә ниндәй оло көс-ҡөҙрәткә эйә!

Көҙҙөң хакимлыҡты үҙ ҡулына алыуы менән киҫкен вируслы сирҙәр ҙә баш ҡалҡыта башлай. Аяҡ аҫты еүеш, һауа үтә дымлы, ә ҡалала йәшәүселәрҙең фатирҙарына йылы бирелмәгән әле. Йоғошло сирҙәр таралһын өсөн үтә яйлы мәл.
Роспотребнадзорҙың Башҡортостан буйынса идаралығы хәбәр итеүенсә, Рәсәй Федерацияһының баш дәүләт санитар врачының “Эпидемия осоронда киҙеү һәм киҫкен респиратор вируслы инфекцияларҙы иҫкәртеү буйынса саралар тураһында”ғы ҡарары көсөнә инде. Шуға ярашлы, Рәсәйҙә халыҡты киҙеүҙән иммунизациялау буйынса эш башланды. Был мөһим сара барыһынан да элек хәүефле төркөмгә ҡараған балалар һәм ололарҙы үҙ эсенә аласаҡ.
Быйыл “Һаулыҡ” милли проектына ярашлы, республикала 800 меңдән ашыу кешегә, тәү сиратта 300 мең балаға, прививка яһау ҡаралған.

Төрлө сәбәптән сәйәси золом ҡорбаны булған кешеләр тураһында элек һағайып, хатта шыбырҙап ҡына һөйләштеләр. Йәмғиәтебеҙҙең арҙаҡлы шәхестәре тураһында һүҙ барғанда ла кешеләр иң яҡын туғандарынан да шикләнде. Ҡасандыр “сәйәси золом ҡорбаны” мөһөрө тағылған, ләкин барлыҡ һынауҙы имен үтеп ҡайтыусылар менән осрашып, һөйләгәндәрен яҙып алғайным.
Ауылдаштарымдан Әҡсән Миһранов 19 йылға иркенән мәхрүм ителә, туғыҙ йылдан бәхетле осраҡ менән амнистияға эләгеп ҡайта. Ғөбәйтулла Таһировҡа, Рамазан Сәлимовҡа ла һуғыш ауырлыҡтарын үтеп, тыуған яғын тағы ла күреү бәхете тейә.
Башта Әҡсән Миһрановтың аяныслы хәтирәләрен һеҙҙең иғтибарға тәҡдим итмәксемен:
“Мин башланғыс мәктәпте тамамлағандан һуң, уҡыуҙы ташлап, атайым менән бергә һунарға йөрөнөм.

No till (ноу-тилл) – халыҡ-ара термин. Инглизсәнән тәржемә иткәндә ул "һөрмәйенсә", "эшкәртеүһеҙ", шулай уҡ дым, ресурс һаҡлаусы йәки нуль, тура сәсеү тигәнде аңлата. Был технологияны индереүгә республикала тәүгеләрҙән булып Әбйәлил районының "Красная Башкирия" хужалығы тотона. Бөгөн Башҡортостандың 35 хужалығы 200 мең гектарҙа ошо ысулды индерҙе лә инде.
Стәрлетамаҡ районының "Рощинский" дәүләт унитар ауыл хужалығы предприятиеһында нуль технологияһы 2010 йылда уҡ дүрт мең гектар майҙанда ҡулланыла башлай. Йәмғиәттең ул ваҡытта өс "Экселента", ике "Обь-2" һәм дүрт берәмек "ДМS-6" сәсеү комплексы була. Нуль технологияһы ҡулланылған баҫыуҙарҙа хужалыҡ ерҙе һөрмәй, культивацияламай һәм тырматмай, һалам баҫыуҙа ятып ҡала. Тәүге йылда уңыш та ярайһы ғына яҡшы була. 2011 йылда нуль технологияһы буйынса хужалыҡ һигеҙ мең гектарҙан ашыу майҙанда сәсә башлай.

Йылдың һәр миҙгеле гүзәл. Ямғыр күп яуһа ла, ҡайһы саҡта өшөтһә лә, көҙ ҙә оҡшай. Тирә-йүн шундай матур! Айырыуса беҙҙең Бөрйәндә.
Был фотоны Әбделмәмбәт мәктәбендә физкультуранан уҡытҡан Зиннур ағай Боҫҡонов төшөрҙө. Унда мин бер туған апайым Миләүшә менән. Зиннур Ғүмәр улы әйткәнсә, фотоға төшөргә башҡорт ҡыҙҙары кейемендә килдек. Тау башынан ауылыбыҙ, алыҫ-алыҫта ятҡан башҡа тауҙар, юлдар ағарып күренә. Шундай бейектә фотоға төшөүе бик оҡшаны! Апайым әйтмешләй, көҙ менән һөйләшкәндәй, серләшкәндәй булдыҡ.

Алина Абдуллина менән Рәмир Әхмәтгәрәев Асҡын районы үҙәгенән. Күрше булғанлыҡтан, бәләкәйҙән бергә уйнап үҫкән тиңдәштәр мәктәпкә лә етәкләшеп килде.
Алина — ифрат шуҡ, шаян, тиктормаҫ ҡыҙыҡай. Рәмир иһә егеттәрсә етди, уйсан. Икеһе лә йыр-бейеүгә оҫта.
Күршеләр үҙҙәрен тәртипле, тырыш уҡыусы итеп күрһәтергә лә өлгөрҙө. Артабан да шулай дауам итеүҙәрен теләйек.

Рәсәй адвокаттарының “Кеше хоҡуҡтары өсөн” ойошмаһы билдәләүенсә, һуңғы дүрт йылда илебеҙҙә ришүәтселек күләме 33 тапҡырға артҡан. Улар фекеренсә, илдәге тулайым эске продукт күләменең 52 проценты ришүәтселек йоғонтоһона эләгә. Ойошма вәкилдәре Рәсәйҙәге ришүәтселек кимәлен билдәләү өсөн 2008 йылдан башлап мөрәжәғәттәрҙе иҫәпкә алған: ул ваҡытта уның уртаса күләме 9 мең һум булһа, бөгөн 300 мең һумға еткән. Ришүәтте Приморье крайында, Мәскәү ҡалаһында һәм өлкәһендә йышыраҡ алалар. Илдең баш ҡалаһында бер ришүәттең уртаса күләме 395 мең һумға барып баҫа! Халыҡ фекерен өйрәнеп, социологтар шундай һығымтаға килгән: һуңғы өс йылда илдә биш кешенең береһе коррупция осрағына юлыҡҡан, уларҙың 63 проценты мәсьәләне ришүәт ярҙамында хәл итергә мәжбүр. Ҡалған 32 проценты башҡа мөмкинлек эҙләгән, ә 25 проценты ҡулында аҡса булмау арҡаһында ғына был юлдан баш тарта икән.