Апрелдән сентябргә тиклем ниндәй һауа торошо булыр?

Йылы ҡыш, йылы март... Артабан беҙҙе ниндәй һауа торошо көтә? Башгидромет синоптиктары апрелдән сентябргәсә яҡынса һауа торошон баҫтырҙы.

Шулай итеп, апрелдә уртаса айлыҡ һауа торошо норманан 1 градусҡа юғарыраҡ була, йәғни +4, +9 градус. Айлыҡ яуым-төшөм норма һәм норманан саҡ ҡына күберәк, яҡынса 20-40 миллиметр көтөлә. Республиканың көнсығышында ямғыр күберәк яуыуы ихтимал.

Майҙа һауа температураһы шулай уҡ норма һәм унан юғарыраҡ булыр тип күҙаллана. Термометрҙар +11, +14 градусҡа тиклем күтәреләсәк. Яуым-төшөм 35-55 миллиметр, был нормаға ярашлы.

Ә бына июндә һауа температураһы норманан саҡ ҡына түбәнерәк көтөлә (+16, +19 градус). Яуым-төшөм – норма сиктәрендә, 50-70 миллиметр. Июлдә лә ямғырҙар ошо кимәлдә һаҡланырға тейеш, ә көнсығышта норманан түбәнерәк. Һауа температураһы норма һәм норманан юғары була һәм +17, +21 градус тәшкил итәсәк.

Августа һауа температураһы норманан әҙерәк юғары буласаҡ – +17, +21 градус. Яуым-төшөм әҙерәк яуасаҡ, көньяҡта нормаға ярашлы. Сентябрҙә лә һауа торошо норманан юғарыраҡ көтөлә. Ул +9, +12 градус булыр тип көтөлә. Ямғырҙар нормаға ярашлы яуасаҡ.

Был күҙаллау яҡынса, уның тап килеү мөмкинлеге 65-70 процент. Һәр айҙа ул яңы мәғлүмәттәргә ярашлы үҙгәрәсәк.

Әлиә Хужәхмәтова фотоһы.