Ғаилә менән ял итеү урындары кәрәк

9-02-2018, 00:03 // Матур үтһен ялығыҙ // Баҫып сығарырға
Ғаилә менән ял итеү урындары кәрәкБашҡортостандың Торлаҡ-коммуналь хужалыҡ министрлығы мәғлүмәттәре буйынса, “Заманса ҡала мөхитен булдырыу” маҡсатлы программаһын тормошҡа ашырыу өсөн былтыр 1 миллиард 32 миллион һум аҡса бүленгән, шул иҫәптән федераль кимәлдәге сығым – 856 миллион, төбәктән – 175 миллион һумдан ашыу. Был финанслау байтаҡ ҡаланы төҙөкләндереүгә, уларҙа уңайлы шарттар булдырыуға ярҙам итте. Шул иҫәптә Стәрлетамаҡ та бар.

2018 – 2022 йылдарҙа тор­мошҡа ашырыласаҡ проект­тың маҡсаты, әйтелгәнсә, ҡала­ларҙы үҫтереүгә, уларҙа ха­лыҡ өсөн уңайлы шарттар, ял урындары булдырыуға ҡайтып ҡала. Шуны­һы һөйөнөслө: бындай ярҙамға ниндәй биләмәләр мохтаж, ҡайҙа ремонт, үҙгәреш талап ителгәнен граждандар үҙҙәре хәл итә. Объекттар уларҙың тауыш би­реүе һөҙөм­тәһенә ярашлы һай­лана. Билдәле, өҫтөнлөк алған проект планға индерелә. Суб­си­дияның өстән ике өлөшө – мотлаҡ күп ҡатлы йорттар ихатаһын төҙөк­лән­дереү, ә ҡалғаны ха­лыҡ күп­ләп йөрөгән урындарҙы (мәҫә­лән, скверҙар, майҙансыҡтар, яр буйҙары) яңыртыуға бүленә.
Нисек һайларға һуң теләгән объектыңды? Был йәһәттән мәғ­лүмәтте ҡала хакимиәт­тәре­нең рәсми сайттарынан та­быр­ға була. Ҡыҙыҡһындырған урынды тапҡас, халыҡ күмәк­ләп проектҡа бәйле үҙ фекерен белдерә, кәңәшләшә ала.
Стәрлетамаҡтар, мәҫәлән, ғинуарҙа 19 проект буйынса тауыш бирҙе. Һайланғандар ара­һында балалар майҙансығы, парктар, Стәрле, Ольховка йылға­ларының яр буйҙары бар. Шулай ҙа халыҡ иң күп тауышты йәйәү­леләр зонаһы өсөн биргән. Тимәк, улар фекеренсә, Стәрле­тамаҡта ғаилә менән ял итеү урындарын күберәк булдырырға кәрәк.
Әйткәндәй, былтыр нәҡ ошо программаға ярашлы ҡаланың Хоҙайбирҙин урамындағы йәйәү­леләр зонаһы төҙөклән­де­релде. Шулай уҡ 90-дан ашыу йорт алды күркәм төҫ алды, велосипедта елдерергә яратҡандарға айырым ял урыны булдырылды, юлдарға асфальт түшәлде, ҡороған ағас­тар урынына йәш үҫентеләр ултыртылды, ҡоймалар яңыртыл­ды, яңы туҡталҡалар барлыҡҡа килде.
Урындағы хакимиәттә әйтеүҙә­ренсә, ҡаланы киләсәктә лә ошондай программалар ярҙамында матурлау мөмкинлеге киң файҙа­ланыласаҡ.

Стәрлетамаҡ ҡалаһы.