Республика иҡтисадына туранан-тура һалынған инвестиция күләме былтыр 300 миллион доллар самаһы тәшкил иткән. Был 2010 йылдағы күрһәткестән өс тапҡырға күберәк. Инвесторҙар өсөн һалым льготалары ҡаралыуы, уларға уңайлы шарттар булдырыусы заманса ҡануниәттең төҙөлөүе республикабыҙға ҡарата ҡыҙыҡһыныу уятмай ҡалмай, әлбиттә. Шулай ҙа, Республика йортонда уҙған өс яҡлы килешеүгә ҡул ҡуйыу сараһында Башҡортостан Президенты Рөстәм Хәмитов әйтеүенсә, төбәгебеҙгә эшлекле һәм дуҫтарса ярҙам етеңкерәмәй.
— Беҙ аяғында ныҡ баҫып торған партнерҙар эҙләйбеҙ.

— Ҡаҙнаға бәләкәй эшҡыуарлыҡтан ингән һалым аҡсаһының 22 процентҡа артыуына ҡарамаҫтан, республика дөйөм килемгә һалымдың үҫеш тиҙлеге буйынса илдәге уртаса күрһәткестән ныҡ ҡына ҡалыша, — тине Премьер-министр Азамат Илембәтов Башҡортостан Хөкүмәте Президиумының сираттағы ултырышында. Сарала төбәк бюджетының быйылғы тәүге өс айҙағы үтәлеше хаҡында һүҙ барҙы.
Хөкүмәт Рәйесенең һүҙҙәренсә, һалым керемдәре иҫәбендә ваҡ бизнестың өлөшө ҙур түгел — ни бары 5 процент, йәғни 1,1 миллиард һум. Шул уҡ ваҡытта бәләкәй һәм урта эшҡыуарлыҡты үҫтереү маҡсатында дәүләт кеҫәһенән йыл һайын кәмендә ике миллиард һум аҡса бүленә.

Рәсәйҙә 65 йәштән хаҡлы ялға сығырға теләүселәр табылыуы икеле
Рәсәйҙә һәр кешенең пенсия күләме уның уртаса килеменән сығып билдәләнергә тейеш. Мәҫәлән, Һаулыҡ һаҡлау һәм социаль үҫеш министрлығы менән Пенсия фондында тап шулай тип иҫәпләйҙәр. Улар тәҡдим иткән пенсияның өр-яңы реформаһының “эш варианты” менән Дмитрий Медведев танышып та өлгөргән инде.
Социаль өлкәләге реформаларҙан Рәсәй халҡы, дөрөҫөн генә әйткәндә, “дер ҡалтырап” тора. Үткән быуаттың 90-сы йылдары, Зурабов реформалары күптәрҙең ышанысын ныҡ ҡаҡшатты. Шуға ла көтөлгән үҙгәрештәрҙе ҡайһы берәүҙәр үтә шикләнеп ҡаршылай.

Сәнәғәт округтары һәм бәләкәй, урта эшҡыуарлыҡ өлкәһендә хеҙмәттәшлек буйынса Рәсәй-Италия эшсе төркөмө 2002 йылда Президент В. Путин менән Италия Премьер-министры С. Берлускониҙың килешеүе һөҙөмтәһендә ойошторола. Эшсе төркөмдөң ХХ ултырышы быйыл май аҙағы — июнь башында Өфөлә үтәсәк. Хөкүмәт йортонда ошо сараны әҙерләү һәм уҙғарыу буйынса ойоштороу комитетының киңәйтелгән ултырышы булды. Уны Премьер-министр урынбаҫары Салауат Сәғитов алып барҙы. Ултырышта Италияның Рәсәйҙәге илселеге һәм Рәсәйҙең Италиялағы сауҙа вәкиллеге хеҙмәткәрҙәре ҡатнашты.

Тауар хаҡтарының ҡотороп тигәндәй артыуына күнектек инде. Аралашсылар ҙа, һатыусылар ҙа оҫтарҙы, хаҡты яйлап, артыҡ һиҙҙермәй генә күтәрә. Аҙыҡ-түлектең күпме тороуы менән ҡыҙыҡһынғанда, ҡайһы берәүҙәрҙең “ярай әле, икмәккә хаҡты йүгәнләп торалар” тип ҡыуаныуын да йыш ишетергә тура килә.
Элегерәк төбәгебеҙ етештереүселәренең тауарҙы баҙарға ҡыйыуһыҙ индереүенә, продукцияларын күрмәлекле итеп төрөп тәҡдим итмәүенә, үҙ урынын ныҡлы ала алмауына борсола инек. Хәҙер хәл үҙгәрҙе: сифатлы итеп етештерә лә, иғтибарҙы йәлеп итерлек итеп төрә лә беләләр, үҙҙәренең ҡулланыусыларын да таптылар. Шул уҡ ваҡытта сит ил һәм башҡа төбәк етештереүселәре лә беҙгә юлын һыуытырға ашыҡмай. Әммә тауар муллығы хаҡтарға йоғонто яһай тип әйтергә иртәрәк. Булмаһа, Өфөнөң Үҙәк баҙарындағы аҙыҡ-түлек хаҡына күҙ һалайыҡ.