Бәләбәйҙәр Яңы йылды йылы йорттарҙа ҡаршыланы

5-01-2018, 00:03 // Иҡтисад // Баҫып сығарырға
Бәләбәйҙәр Яңы йылды йылы йорттарҙа ҡаршыланыБәләбәй ҡалаһында күп фатирлы йорттарҙы ҡышҡы айҙарҙа йылы тотоу, кешеләрҙе эҫе һыу менән тәьмин итеү, уңайлы көнкүреш шарттары тыуҙырыу өсөн тырышлыҡ һала “Теплоэнерго” йәмғиәте хеҙмәткәрҙәре. Шуға ла бер ваҡытта ла йылылыҡ һәм эҫе һыу биреүҙә өҙөклөктәргә юл ҡуйылмай.

Сергей Лущиц – ғаилә династияһы йылъяҙмаһына лайыҡлы өлөш индергән шәхестәрҙең береһе. Сергей Анатольевич, 1998 йылда Өфө дәүләт нефть техник университетын тамамлағандан һуң, яҙмышын ошо предприятиеға бәйләй. Ябай слесарҙан башлай ул хеҙмәт юлын. Тармаҡтың асылына төшөнә, йылылыҡ һәм эҫе һыу менән тәьмин итеүҙәге эш алымдарын өйрәнә. Заманса техноло­гияларға таянған ойошмала газ ҡаҙанлыҡтарын хеҙмәтләндереүҙе үҙ­ләштерә. Мастер, баш инженер итеп тәғәйенләнә. Юғары ойоштороу һәләтенә эйә белгесте предприятие етәксеһе итеп ҙур ышаныс күрһәтәләр. Атаһы Анатолий Николаевич Лушиц 22 йыл ошо ойошмала директор булып эшләгән, тармаҡтың үҫешенә күп көс һалған.
Йәмғиәт Бәләбәй ҡалаһында ғына түгел, республикала ла алдынғы булып танылған. Улар хеҙмәтләндергән йорттарҙа йәшәгәндәр хаҡлы рәүештә “йәмғиәттән уңдыҡ” тиҙәр, сөнки хеҙмәтләндереү сифаты юғары.
Предприятиеның үҫеүендә уның элекке етәксеһе, Башҡортостандың атҡаҙанған торлаҡ-коммуналь хужалыҡ хеҙмәткәре Розалия Аҡбашеваның да өлөшө ҙур. Ул ҡала халҡы өсөн социаль яҡтан әһәмиәтле предприятиены артабан да тарҡатмай, үҫешергә булышлыҡ иткән белгесте ҡуш ҡуллап эшкә өйрәтә.
– Торлаҡ-коммуналь хужалыҡты хеҙмәт­ләндереү – ауыр ҙа, яуаплы ла эш. Ул ифрат ҙур көс, таһыллыҡ, сослоҡ талап итә. Ең һыҙғанып тир түккәндә генә һөҙөм­тәһе үҙеңде лә, халыҡты ла ҡыуандыра, шуға күрә беҙҙә уңғандар, тырыштар, үҙ көсөнә ышанғандар ғына эшләй, – ти директор урынбаҫары Розалия Заһит ҡыҙы, үҙенең хеҙмәттәштәре менән ғорурланып.
Розалия Аҡбашева оҙаҡ йылдар “Бәләбәйавтонормаль” заводында баш бухгалтер булып эшләй. “Башкиргаз” йәмғиәтенең “Бәләбәй” филиалында тәжрибә туплай, һуңғы ун бер йылда “Теплоэнерго” йәмғиәтенә етәкселек итә.
Йәмғиәт Бәләбәй ҡалаһындағы биш эре ҡаҙанлыҡтың эше өсөн яуаплы. Бынан тыш, Приют, Аксаков ҡасабаһында, “Аҡсарлаҡ” балалар һауыҡтырыу комплексында йәмғеһе ун бер ҡаҙанлыҡтың эшен көйләй. Предприятие йөҙ саҡрымдан ашыу йылылыҡ селтәрен хеҙмәтләндерә, ҡалалағы 521 торлаҡ йортто йылы һәм 138-ен эҫе һыу менән тәьмин итә.
Йәмғиәт Башҡортостандың Торлаҡ-коммуналь хужалыҡ министрлығы тәҡдиме буйынса тармаҡта Рәсәйҙең ун алдынғы ойошмаһы милли реестрына индерелде. “2013 йыл предприятиеһы” исеменә лайыҡ булыуҙары ла оло абруй, фиҙакәр хеҙмәт хаҡында һөйләй.
Предприятиела тырыш эшселәр байтаҡ. Баш энергетик Ришат Заһретдинов, баш инженер Риф Хәйретдинов, участка начальнигы Владислав Болдырев, баш бухгалтер Римма Камартдиноваға таяна етәксе. Ғаилә династияһынан Әхмәҙиев­тәр, Ғилметдиновтар, Водопьяновтар, Филенко, Лущицтар тәүлектең теләһә ҡайһы мәлендә эшкә тотонорға әҙер. Диспетчер Наталья Архипова, участка мастерҙары Рөстәм Ғиниәтуллин, Евгений Яковлев, Николай Бочкаревты ла маҡтап телгә алалар бында.
Иретеп йәбештереүсе Игорь Гераси­менконың уңғанлығын әйтеп үтәйек. Ул траншеяла иң ҡатмарлы “ямауҙы” табып, ялғай ала. Автотранспорт хеҙмәтенең абруйы ла юғары. Махсус техниканы тиҙ арала йүнәтергә, ваҡытында тәьмин итергә өлгөрәләр. Әлбиттә, 2013 йылдан алып техника паркы яңыртылып тора: “ГАЗель”, УАЗ һәм экскаватор алынды. Хәҙерге ваҡытта инвестиция программаһы тормошҡа ашырыла, уның һөҙөмтәһендә сығымдар кәмейәсәк, йылылыҡ менән тәьмин итеүҙең сифаты артасаҡ. Артабан ҡаҙанлыҡтарҙан йыһаздарҙы яңыртыу, автоматлаштырыу, иҫке йылылыҡ селтәрҙәрен алмаштырыу күҙаллана.
“Теплоэнерго” хеҙмәткәрҙәре Бәләбәй халҡынан үҙҙәренең эшмәкәрлеге өсөн рәхмәт һүҙҙәре генә ишетә.