Тәгәрмәс өҫтөндәге яҙыуҙар ни һөйләй?

30-06-2016, 19:33 // Тәгәрмәс // Баҫып сығарырға
Тәгәрмәс өҫтөндәге яҙыуҙар ни һөйләй?Йыш ҡына шулай була: яңы покрышка алғанда беҙ уның тыш яғына яҙылған тамғаларға иғтибар биреп тормайбыҙ. Үлсәме һәм етештергән заводы буйынса элекке туҙған алмашына тура киләме? Килә. Тимәк, алабыҙ. Ғәмәлдә тамғалар байтаҡ мәғлүмәт бирә (һүрәтте ҡарағыҙ).


1. Иң мөһим күрһәткес. Ул шинаның үлсәмдәрен аңлата. Индекстағы беренсе һан – покрышканың миллиметрҙағы киңлеге, икенсеһе – профилдең бейеклеге (шинаның киңлегенә ҡарата проценттарҙа). Артабанғы тамға шинаның конструкцияһын хәбәр иткән хәреф һәм покрыш­каның тәгәрмәскә (дискка) кейҙе­реү диаметры. Мәҫәлән, 195/65 R15 тамғаһын шулай аңларға кәрәк: шинаның киңлеге – 195 миллиметр, профилдең бейеклеге – 126,75 миллиметр (киңле­генең 65 проценты), R – покрышка радиаль конструкцияға эйә (диагональ конструкциялар ҙа бар, ләкин хәҙер улар бик һирәк ҡулланыла), дискка ултыртыу диаметры – 15 дюйм. Ҡайһы саҡ был индекста профилдең бейеклеге билдәләнмәй (мәҫәлән, 195 R15). Уныһы инде профиль бейеклеге 80 проценттан арты­ғыраҡ булыуын күрһәтә. Бындай покрышкалар тулы профилле тип атала һәм нигеҙҙә еңел йөк машиналарында, фургондарҙа ҡулланыла.
2. Йөк күтәреү коэффициенты. Ул 0-дән алып 130-ға саҡлы һандарҙы үҙ эсенә ала һәм улары килограмды аңлата.
3. Тиҙлек индексы. Бындағы латин хәре­фе шинаның ниндәй тиҙлеккә иҫәпләнгән булыуын күрһәтә. Һәр хәрефкә үҙенең күр­һәткестәре хас. Мәҫә­лән, ошо һүрәттәге Т хәрефе покрышка өсөн иң ҙур тиҙлектең сәғәтенә 190 километр йәки 118 миль булыуын хәбәр итә.
4. Был яҙма шина каркасының көсәй­телгән икәнлеген аңлата, уныһы коммерция техникаһы өсөн покрышкаларға хас. Мәҫәлән, 195/65 R15 C индексындағы “С” хәрефе “commercial” тигән төшөнсә бирә.
5. Шинаны етеш­тергән ил. Мәҫәлән, made in France – Францияла эшләнгән, made in Germany – Германияла яһалған.
6. Протекторының һүрәте ассимметрик булған шиналарҙың ҡабырға яғына ҡуйылған тамға. Ул Outwards, Out, Side facing outwards һәм башҡа һүҙҙәр менән билдәләнә.
7. Шинаның төрлө шарттарға яраҡлашыуын аңлата: M+S – Mud + Snow: бысраҡ плюс ҡар; As – All Season: теләһә ниндәй миҙгел өсөн; Aw – Any Weather: теләһә ҡайһы һауа шарттарында ла мөмкин; Aquatred, Aquacontact йәки ҡулсатыр рәүешендәге пиктограмма – ямғыр өсөн махсус шиналар. Ҡар бөртөгө төшө­рөлгән пиктограмма ҡырыҫ ҡышҡы шарттар өсөн тигәнде аңлата. Бер ниндәй тамға ҡуйылмаған шиналар йәй йөрөр өсөн генә яраҡлы.
8. Tube Type (ТТ) – камералы шина, Tubeless (ТL) – камераһыҙ.
9. Сертификация билдәһе. Европа ҡағиҙәләре буйынса раҫланған шиналарҙа ул Е хәрефе менән тамғалана, артабан ошо ҡағиҙәләргә ҡушылған илдең һаны яҙыла. Рәсәй был исемлектә 22-се булып тора.
10 Шина етештергән ком­панияның исеме йәки логотибы. Мәҫәлән, Michelin, Good Year, Yokohama.
11 Покрышканың моделе. Мәҫәлән, Energy, SP Sport 9000, Turanza ER300.