Май сүлмәге тышынан билдәле

30-06-2016, 19:35 // Тәгәрмәс // Баҫып сығарырға
Май сүлмәге  тышынан билдәлеАвтомобиль һатып алғанда уның двигателен нисек тикшереп ҡарарға? Бының өсөн моторҙы тоҡандырмайынса уның тышҡы күренеше буйынса ла фекер тупларға мөмкин.

Шыйыҡлыҡ эҙҙәре

Һатырға ҡуйылған машинаның двигателен йыуып-таҙартып әҙерләргә кәрәкме? Был турала бәхәстәр күп. Тәжрибәле автосле­сарҙар әйтеүенсә, йыуылған мотор – май ағып сығыуын йәшерергә маташыу. Болт һәм гайкаларҙың башын ентекләп ҡарағыҙ, уларҙа май эҙен тулыһынса бөтөрөү ҡыйын.
Ҡатламалары герметик булған двигателдең клапан ҡапҡас­та­ры, май фильтры, картер, терһәкле вал шкивы, тапшырыуҙар ҡумтаһы өҫтөндә май күренергә тейеш түгел. Уның эҙҙәре бар икән, тимәк, хужаһы двигателдең артыҡ ҡыҙыуына юл ҡуйған, һөҙөмтәлә сальниктар һәм резина тығыҙ­лағыстар һығылмалылығын юғалтҡан. Ҡыҫҡаһы, был “таҙа” моторлы машинаны бер аҙ йөрөтә башлауға унан күпләп май ағып сығыуы бәләгә әүереләсәк. Тиҙҙән двигателдең үҙен дә алмашты­рырға тура килмәгәйе... Был саҡта автомобилде һатып алыуҙың да мәғәнәһе ҡалмайҙыр.
Поршендәр төркөмөнөң туҙыуы ла май ағып сығыуға сәбәп була. Тимәк, картерҙағы май яныу камераһына үтеп инә, яғыулыҡҡа ҡушыла. Һөҙөмтәлә моторҙың эштән сығыу ваҡыты ла тиҙ килеп етәсәк.

Майлау системаһының торошо

Май кимәлен күрһәткән таяҡ­саны сығарып ҡарағыҙ. Кимәлдең юғары сиге “max” менән “min” тамғалары араһында булырға тейеш. Майҙың тоноҡ булыуы ҡур­ҡыныс түгел: ул ышҡылыусы металдың туҙанын да үҙенә йыя бит. Ә бына майҙың ҡап-ҡара төҫкә инеүе моторҙың ныҡ туҙған икәнлегенә ишаралай.
Май ҡойоу ҡапҡасын асып, уның эске яғына күҙ һалығыҙ: пас­та кеүек яғылған ҡуйы май моторҙың ныҡ ҡыҙырға ғәҙәтлә­неүен йәки ярамаған май һалы­ныуын раҫлай. Ошо ҡапҡас аша фонарь менән яҡтыртып, газ бүлгеләү механизмының детал­дәрен ҡарарға тырышығыҙ, байтаҡ туҙған моторҙа уларҙы күреү мөмкин дә булмаясаҡ : улар ҡара-һоро йәки ҡара төҫ менән ҡап­ланған булырҙар, ә төҙөк дви­гателдә алтынһыу төҫ аласаҡтар.
Үтә күренмәле май уны һатыуға әҙерлек алдынан ғына алмаштырыуҙарын күрһәтә. Какао төҫөндә булһа, тимәк, картерға һыуытыусы шыйыҡлыҡ эләгә тигән һүҙ, был осраҡта инде двигателде артабан ҡарап тормаһағыҙ ҙа була – автомобилде алыуҙан баш тартырға ла мөмкин.

Һыуытыу системаһы

Радиаторҙы ентекләп ҡара­ғанда уның ҡойоу муйынсығында тутыҡ бармы-юҡмы икәнлегенә иғтибар итегеҙ. Һыуытыу сис­темаһының шыйыҡсаһы өсөн киңәйтелеү һауыты тураһында ла шуны уҡ әйтергә мөмкин. Һыуытыу шыйыҡсаһының төҫө теләһә ниндәй була ала (ул антифриз йәки тосолдың маркаһына бәйле), ләкин төп шарт – уның өҫтөндә май таптары йөҙөп йөрөмәҫкә, ә үҙе үтә күренмәле булырға тейеш. Хатта уның тоноғораҡ күренеүе лә шик уятырға тейеш.