Сәхнәгә сыҡҡан әсәләрҙең уңғанлығын әйт әле! Һәр кеме үҙе менән бөхтә кейенгән, күҙҙәре уйнап торған балаларын алып сыға. Шунан башлана инде күркәм тамаша! Балалар дер һелкетеп бейей, береһенән-береһе матур шиғыр һөйләй, әсәһе хаҡында йылы һүҙҙәр әйтә:
— Беҙҙең әсәйебеҙ иң яҡшыһы!
— Уны сикһеҙ яратабыҙ!
— Аҡыллы ла, яғымлы ла!
— Өйгә эштәрҙе гел бергә эшләйбеҙ, шуға ла уҡыуыбыҙ ҙа яҡшы!
Ошо ваҡыт сәхнә, әйтерһең дә, йондоҙсоҡтар майҙанына әүерелә.

Ғаиләлә бала донъяға килеү — һәр ата-әсә һәм зат-ырыу өсөн оло ҡыуаныс. Был матур ваҡиғаға бәйле йолалар быуындан быуынға тапшырыла килгән. Мәҫәлән, элек башҡорт ауылында бәпес тыуһа, бала тапҡан әсә ун көндәй түшәктә тәрбиәләнеп ятҡан, кендек инәһе уға хәл индереүсе төнәтмәләр эсергән, сихәт биреүсе майҙар һөрткән. Ауылдағы һәр ҡатын-ҡыҙ төрлө күстәнәс, бүләк тотоп, әсә менән сабыйҙың хәлен белә килгән, изге теләк теләгән, ир-ат атай кешегә хуплау һүҙҙәре әйткән.

“Башҡорт теле һәм әҙәбиәте йыл уҡытыусыһы” бәйгеһе быйыл айырыуса йәнле һәм сәмле барҙы. Конкурсанттарҙың ярышҡа ныҡлы әҙерлеге, уларҙың араһында сит төбәк вәкилдәренең, ир-аттың байтаҡ булыуы, яңы номинацияларҙың был ҡаҙанышта роле ифрат ҙур.
Бәйгегә йомғаҡ 31 мартта яһалды. Мәғариф өлкәһе хеҙмәткәрҙәре генә түгел, туған телебеҙҙе һаҡлау һәм үҫтереү, яңы быуынды тәрбиәләү теләге менән янған һәр кем өсөн берҙәй матур байрамға әүерелгән күркәм тантана М. Кәрим исемендәге Милли йәштәр театрында үтте.
— Быйылғы конкурстың төп үҙенсәлеге бәйгеселәрҙең һөнәренә заманса һулыш, яңылыҡ индерергә ынтылыуында булды, — тине республиканың мәғариф министры Әлфис Ғаязов.

Республиканың Сауҙа һәм ҡулланыусыларҙың хоҡуҡтарын яҡлау буйынса дәүләт комитеты Башҡортостандың Сауҙа ассоциацияһы менән берлектә “Башҡортостан продукты” билдәһе эмблемаһын эшләүгә конкурс иғлан итә.
Ул Башҡортостан Республикаһында тауар етештереүҙе дәртләндереүгә йүнәлтелгән “Үҙебеҙҙекен һайла, үҙебеҙҙекен һатып ал” акцияһын дауам итеүгә ярашлы һәм 2011 йылдың 1 ноябрендәге “Башҡортостан Республикаһында аҙыҡ-түлектең сифатын һәм хәүефһеҙлеген тәьмин итеү буйынса саралар тураһында”ғы Башҡортостан Республикаһы Законын үтәү йөҙөнән үткәрелә.

Ауылыбыҙҙың көньяҡ өлөшөндә, текә яр аҫтынан урғылып-урғылып, ете урындан һыу сығып ята. Улар, бөтәһе бергә ҡушылып, үтә күренмәле, көмөштәй саф һыулы Ҡаран шишмәһен барлыҡҡа килтерә.
Юл ыңғайында булғанлыҡтан, юлаусылар уның эргәһендә туҡталып, баҡсаһында ял итмәй китмәй. Үҙҙәре менән күпләп һыу алалар.
Ауыл халҡының хәтерендә ҡалғанса, шишмәбеҙ элек ҡарағай, ҡайын урманы эсенән, тирә-яғы төрлө емеш-еләк ҡыуаҡтары менән уратып алынған ерҙән юл алған. Бик күп йылдар үткән, ә шишмә ағыуын дауам иткән.