Ошо көндәрҙә Ишембай районының Этҡол ауылында йәшәгән ҡәҙерле әсәйебеҙ Нәсимә Ғайса ҡыҙы ӘЙҮПОВА үҙенең матур ғүмер байрамын – 55 йәшлек күркәм юбилейын билдәләй.
Ҡәҙерлебеҙ йәйге ҡояш йылыһы күңелдәргә нур бүләк иткән матур айҙа тыуғанғамы, сабыр ҙа, мәрхәмәтле лә, ярҙамсыл да, гүзәл дә, эшлекле лә! Әсәйебеҙ ғүмер буйы яуаплы вазифаларҙы башҡарҙы. Бөгөн иһә ул — Этҡол ауыл Советы хакимиәте башлығы. Һәр ваҡыт халыҡ менән, һәр ваҡыт кешеләр мәнфәғәтендә. Әммә яратҡан эштең ауыры буламы ни? Әсәйебеҙ ҙә һәр кемгә иғтибарлы һәм ихтирамлы. Шуға ауылдаштары ла уны хөрмәт итә, ярата. Ғөмүмән, барыһына ла етә уның йөрәк йылыһы — яҡындарына ла, туғандарына ла, дуҫтарына ла, ауылдаштарына ла.
Киләсәктә лә әсәйебеҙгә тик аяҙ көндәр, яҡты иртәләр, ныҡлы сәлә­мәт­лек, оҙон ғүмер, аҡ бәхеттәр теләй­беҙ. Тормош һынауҙарына биреш­мәйенсә, ауыр­лыҡ­тар алдында баш эймәйенсә, йәшәүҙән йәм табып, изгелектәренең игелеген күреп, бала­ларының күңел йылыһын тойоп, бәхет-шатлыҡта, мул тормошта, иҫәнлектә-һаулыҡта атайыбыҙ менән оҙон, тигеҙ ғүмер кисерергә насип итһен!

Беҙҙең өсөн йөрәк йылың бүлеп,
Күҙ нурҡайҙарыңды түккәнһең.
Күтәрмәҫтәй йөктәр күтәргәнһең,
Оҙон тормош юлын үткәнһең.
Һәммәбеҙҙең изгелеген күреп,
Шатлыҡ ҡына кисер һин, әсәй!
Бәхет менән, сәләмәтлек менән,
Беҙҙе ҡыуандырып йөҙ йәшә!

Иң изге теләктәр менән тормош иптәше, ҡыҙҙары Әлфиә, Ләйсән, кейәүҙәре Вадим, Денис, ейән-ейәнсәрҙәре Иҙел, Урал, Юлиә, Диана, Камила.

* * *
Өйләнешеү, күңелле итеп туй үткәреү – бәхетле кешенең ғүмеренә бер генә килә торған зауыҡ нәмә, тиҙәр. Бөгөн иһә шундай бәхетле пар – Баймаҡ районының Шүлкә ауылы егете Радик МЕРӘҪОВ менән Ейәнсура районының Иҫәнғол ауылы һылыуҡайы Азалия ШӘЙӘХМӘТОВАның донъя­лағы иң иҫтәлекле һәм шатлыҡлы көнө!
Әле берегеҙ – ҡояш, икенсегеҙ ай кеүекһегеҙ, шул ике йәшлектең таң­дары ҡушылған, йәндәре берләшкән мәл. Йән яратҡан, күңел тартҡан йәр берәү генә була. Ваҡытында табыш­ҡанһығыҙ, ваҡытында ҡауышҡанһығыҙ. Шул никахты күҙ алмаһы һымаҡ һаҡлағыҙ, туйҙа яуған теләктәрҙең барыһын да аҡлағыҙ. Һәр көнөгөҙ яҡты һәм йылмайып үтһен, шатлыҡҡа ҡойоноп йәшәгеҙ! Бәхетегеҙ һүнмәһен, пар ҡанатлы булып ғүмер итегеҙ!
Алтын балдаҡ кейгән был көнөгөҙ
Һағындырыр тормош көткәндә,
Һаман да йәш, матур һеҙ, тиһендәр
Алтын туйҙы байрам иткәндә.
Бәхетегеҙ тулып, ташып торһон,
Мәңге бергә татыу йәшәгеҙ,
Изгеләрҙән-изге теләк һеҙгә:
Ҡотло булһын йәшлек туйығыҙ!

Ҡотлау менән Өфөнән Роза һәм Илдар АҠЪЮЛОВТАР.