Ҡарарҙы үтәмәһәң...

12-01-2018, 00:03 // Информация // Баҫып сығарырға
Ҡарарҙы үтәмәһәң...Дәүләт Йыйылышы — Ҡоролтай депутаттары Башҡортостандың Терроризмға ҡаршы комиссияһы ҡарарҙарын үтәмәгән йәки боҙған өсөн административ яуаплылыҡ билдәләргә ниәтләй. Ошо көндәрҙә Дәүләт төҙөлөшө, хоҡуҡ тәртибе һәм суд мәсьәләләре буйынса комитет “Башҡортостан Республикаһының Административ хоҡуҡ боҙоуҙар тураһындағы кодексына үҙгәрештәр индереү хаҡында”ғы закон проектын хуп­ланы. Ул республика парламентының киләһе пленар ултырышында тикшереләсәк.


— Башҡортостан Республикаһының Терроризмға ҡаршы комиссияһы Рәсәй Федерацияһы Президенты ҡарары менән төҙөлдө. Был орган террорсылыҡты иҫкәртеү һәм уның эҙемтәләрен бөтөрөү буйынса эшмәкәрлекте көйләй, — тине Дәүләт Йыйылышы — Ҡоролтай Рәйесе Константин Толкачев. — Федераль ҡануниәткә ярашлы, бындай комиссияларҙың ҡарарҙары дәүләт власы һәм урындағы үҙидара органдары, ойошмалар, вазифалы кешеләр һәм граждандар тарафынан мотлаҡ үтәлергә тейеш. Төбәктәр комиссиялар ҡарарын үтәмәгән өсөн яуаплылыҡты үҙаллы билдәләргә вәкәләтле. Әлеге закон проекты ошоға бәйле әҙерләнде. Террорсылыҡты иҫкәртеүгә һәм уға ҡаршы көрәшкә бөтә донъяла ҙур иғтибар бирелә. Шуға күрә был өлкәләге ҡарарҙарҙы үтәү мотлаҡ. Яуаплылыҡ йәмғиәттә тәртип булдырыуға, террорсылыҡ хәүефен кәметеүгә булышлыҡ итәсәк.
Яңы закон ҡабул ителгән осраҡта комиссия ҡарарҙарын боҙған өсөн граждандарға бер-өс мең һум, вазифалы кешеләргә — 10-20 мең, ойошмаларға 30-50 мең һум штраф һалырға тәҡдим ителә. Тәртип ҡайтанан боҙолһа, штраф күләме тағы ла арттырыла.