Дауыл ғәбдөктәрҙе һынай...

31-01-2018, 00:03 // Информация // Баҫып сығарырға
Дауыл ғәбдөктәрҙе һынай...Уҙған аҙнала Белорет районының Ғәбдөк ауылында көслө дауыл үтте. Рәсәй Ғәҙәттән тыш хәлдәр министрлығының Башҡортостан Республикаһы буйынса идаралығы мәғлүмәттәре буйынса, уның тиҙлеге секундына 20 – 24 метр тәшкил иткән.
Афәт арҡаһында туғыҙ хужалыҡҡа зыян килә, сымдар өҙөлөү сәбәпле, электр менән тәьмин итеү туҡтала. Алты йорттоң өлөшләтә ҡыйыҡтары, фронтондары, верандалары емерелә. Төҙөлөш барған яңы йорттар бигерәк тә ныҡ зыян күрә: дауыл икәүһенең ҡыйығын тулыһынса алып бәрә. Ҡайһы бер шәхси хужалыҡ­тарҙа мунса, һарайҙар, ҡаралтылар емерелә.



Иван ПИНЯЩУК, район хакимиәте башлығы урынбаҫары, Ғәҙәттән тыш хәлдәр комиссияһы рәйесе:
– Бөгөн зыян күләмен билдәләү буйынса комиссия эшләй. Башҡортостан Хөкүмәтенең “Башҡортостан Республика­һында ауыр тормош хәлендә ҡалған граждандарға матди ярҙам күрһәтеү тәртибе положениеһын раҫлау тураһын­дағы” 410-сы ҡарарына ярашлы, ҡаза күреүселәргә матди ярҙам күрһәтеләсәк. Башлыса төҙөлөш барған өйҙәр зыян күргән. Күбеһенең йорттарына документтары юҡ, был сетерекле мәсьәлә лә хәл ителер, тип уйлайым.

Шәүкәт САЛАУАТОВ, Йөйәк ауыл хакимиәте башлығы:

— Ғәбдөк ауылы халҡы берҙәм, татыу. Тәбиғәт уларҙы беренсе тапҡыр ғына һынамай, 2013 йылда булған ташҡынды барығыҙ ҙа хәтерләйһегеҙҙер. Был юлы ла үҙҙәренең тырышлығы менән икенсе көнөнә үк электр тәьминәте тергеҙелде, ҡаза эҙемтәләре лә яйлап бөтөрөлөр. Ауыл Советына ҡараған ауылдарҙа йә­шәүселәр ярҙам итеү маҡсатынан аҡса йыя башланы, урындағы эшҡыуарҙар ҙа изге эштән баш тартмаҫ. Иң мөһиме, Ал­ла­ға шөкөр, кеше ғүмерҙәре ҡыйылма­ны, башҡаһын берҙәм көс менән терге­ҙербеҙ.