Кәмендә 450 кооператив төҙөләсәк

27-04-2018, 00:03 // Информация // Баҫып сығарырға
Рәсәй Йәмәғәт палатаһы Өфөлә ойошторған “Берләшмә” форумында билдәләүҙәренсә, 2020 йыл аҙағына тиклем Башҡортостанда кәмендә 450 ауыл хужалығы ҡулланыусылар кооперативын төҙөү күҙаллана. Әле республикала 116 кооператив теркәлгән. Шуларҙың 39-ы — былтыр, 16-һы быйыл барлыҡҡа килгән.

Теркәлгән 116 ауыл хужалығы ҡулла­ныусылар кооперативының 80 проценты тиерлек һөҙөмтәле эшләй. Кооперация системаһын үҫтереү буйынса планға ярашлы эш быға күп яҡлап булышлыҡ итә.
Республика Башлығы Рөстәм Хәмитов­тың указына ярашлы 2020 йылға тиклемге осорға Ауыл хужалығы ҡулланыусылар кооперацияһын үҫтереү концепцияһы раҫланды. Йыл һайын грант ярҙамына һәм килемле проекттарға 400 миллион һум самаһы аҡса бүлеү күҙаллана.
— Ауыл хужалығы ҡулланыусылар кооперативы — табышты арттырыу мөмкинлеге ул. Мәҫәлән, кооператив һөт йыйып, уны эшкәртһә, кооперативтың һәр ағзаһының бер һыйырҙан алған табышы 80 меңдән 100 мең һумға тиклем артыуы ихтимал. Насармы ни? — тине форумда республика Хөкүмәте Премьер-министры урынбаҫары, ауыл хужалығы министры Илшат Фазрахманов.