Баш ҡаланың Ленин районы прокуратураһы ҡала етәкселегенән Клавдия Абрамованың һәйкәлен тәртипкә килтереүҙе талап иткәйне.
Ҡоролма Бөйөк Ватан һуғышына бағышланған Иҫтәлекле ҡоролмалар реестрына ингән һәм уны тәртиптә тотоу яуаплылығы урындағы үҙидара органдарына йөкмәтелгән.
Ҡала хакимиәтенән хәбәр итеүҙәренсә, 8 Март исемендәге Өфө тегеү фабрикаһы алдына ҡуйылған һәйкәлдең тирә-яғы таҙартылған, етешһеҙлектәр бөтөрөлгән.

20, 21 апрелдә Федераль һалым хеҙмәте Асыҡ ишектәр көнө үткәрә. Сарала республиканың барлыҡ һалым инспекциялары ҡатнаша.
Был көндө теләгән һәр кем урындағы инспекцияға консультация һәм ярҙам һорап мөрәжәғәт итә ала, лекциялар ойоштороласаҡ. Бигерәк тә физик шәхестәрҙең һалым декларацияһын тултырыу буйынса һорауҙарына ҙур иғтибар биреләсәк. Әйткәндәй, декларацияны апрель аҙағына тиклем тапшырырға мөмкин.

Төньяҡ Кореяла Ким Ир Сендың тыуыуына 100 йыл тулыуҙы билдәләйҙәр. Ошо айҡанлы тоталитар режимлы дәүләткә сит ил журналистары саҡырылған.
Уларға Ерҙең "Кванменсон-3" исемле яһалма юлдашын күрһәткәндәр. Чхольсан өйәҙендәге космодромда урынлашҡан аппаратты тиҙҙән Йыһанға оҙатмаҡсылар, ул метеорологик элемтә ғәмәлдәрен башҡарасаҡ. Шулай уҡ юлдаш аша илдең ике Бөйөк Юлбашсыһы Ким Ир Сен менән Ким Чен Ир тураһында йырҙар башҡарыласаҡ.

Бәлки, яҡын киләсәктә иҫерек килеш рулгә ултырған водителдәрҙе ғүмерлеккә автомобиль йөрөтөү хоҡуғынан мәхрүм итә, ә транспорт сараларын конфискациялай башларҙар. Ошондай закон проектын Рәсәйҙең Дәүләт Думаһы ҡарауына тәҡдим итмәкселәр.
Эш шунда: ҡанундар ҡатыраҡ була барһа ла, уларҙы һанға һуҡмаусылар кәмемәй. Рәсәйҙә 40, 50, 60 йылға тиклем автомобилгә идара итеү хоҡуғынан мәхрүм ителгән кешеләр бар. Ә Кемерово ҡалаһындағы бер егеттең "хоҡуҡһыҙлыҡ стажы" 86 йылға еткән.

Ял көнөндә, Йылайыр районының Солтанморат ауылында янғын сығып, өс кеше һәләк булған.
Ут һүндереүселәр 1930 йылғы пенсионерҙың, 1963 йылғы ирҙең һәм 18 йәшлек ҡыҙҙың мәйетен тапҡан. 80 йәшлек хужабикә төрлө тән йәрәхәте менән дауаханаға оҙатылған. Белгестәр фажиғәнең сәбәптәрен асыҡлай.