“Яратам мин был байрамды...”

30-04-2013, 02:41 // Йәмғиәт // Баҫып сығарырға
1 Май — элек-электән күптәрҙең көтөп алған байрамы. Хәҙер кемдер уны тәбиғәткә сығып ял итеү маҡсатында ғына файҙалана, кемдәрҙер баҡсаларында яҙғы эштәрен башлай, ә бәғзеләр өсөн майҙың тәүге көндәре — буш ваҡытын ғаиләһе менән бергә үткәреү мөмкинлеге генә. Элегерәк 1 Майҙы бөтөнләй икенсе төрлө ҡабул итәләр ине. Ә һеҙ был көндө нисек үткәрәһегеҙ?

Нурулла МИҺРАНОВ,
Белорет районы:
— Был байрамға өлкән кешеләрҙең бихисап хәтирәләре бәйле. Уға апрелдән үк әҙерләнә башлай инек, транспаранттар яҙабыҙ, уларҙы биҙәйбеҙ, ҡағыҙҙан сәскәләр эшләйбеҙ. Гәзит-журналдарҙа хеҙмәт кешеләренә арнап мәҡәләләр сыға ине. Бөгөн, ҡыҙғанысҡа ҡаршы, ундай материалдар һирәк. Хеҙмәт кешеһе бит ҡайҙа ғына һәм ниндәй осорҙа йәшәүенә ҡарамаҫтан, барыбер тырышып эшләй. Уларға хөрмәт бөгөн дә тейешле кимәлдә булһын ине. Нисек кенә булмаһын — 1 Май ҙур байрам, ысын яҙ башланыуын күрһәтә. Уны өлкәндәр ҙә, балалар ҙа һағынып көтөп ала.

Илзидә БӘХТИГӘРӘЕВА,
Күгәрсен районы:
— Быйыл 1 Май һәм 9 Май байрамдарына ял көндәре күп тура килә. Был бик шатландыра, дөйөм алғанда, ун көн самаһы ял итәсәкбеҙ. Ярты отпуск хәтле бит был! Пландар ҙур: өйҙәге эштәрҙе бөтөрөргә кәрәк, аҙаҡ ауылға атай-әсәй янына ҡайтып, баҡса ултырта башларға ярҙам итәсәкбеҙ. Йола буйынса бөтә туған-тыумаса йыйыласаҡ, ит ҡурып табын ҡорасаҡбыҙ.

Сабир ВӘЛИТОВ,
Ишембай районы:
— Беренсе майҙың хеҙмәт байрамы икәнлеге иң нығы ауылда беленә инде ул. Баҡса эштәренең ҡыҙған мәле тап ошо көндәргә тура килә. Ғөмүмән, ҡара яҙҙан алып көҙ аҙағына тиклем ауыл кешеһе ихатанан бик инә лә алмай. Бер ҙә зарланып әйтмәйем быны — иҫән-һау саҡта саф һауала эшләүе, баҡса үҫтереүе, мал ҡарауы ҙур шатлыҡ ул. Балалар, туғандар ҡайтасаҡ. Көндөҙ өмә үткәрһәк, кисен табынға йыйылырбыҙ.

Ильяс ДИЛМӨХӘМӘТОВ,
Өфө ҡалаһы:
— Йәш саҡта яңғырауыҡлы лозунгтар ҡысҡырып, транспаранттар тотоп урам буйында йөрөй торғайныҡ. Ни генә тимә — барыбер күңелле осор булған ул! Заводта эшләгән барлыҡ коллектив менән бергәләшеп сыға торғайныҡ. Берҙәмлекте арттырған, теләктәшлекте сағылдырған байрам ине. Әле иһә был көн сәйәси әһәмиәтен юғалтты. Күптәр 1 Майҙы яҙ башланыу, тәбиғәткә сығып шашлыҡ ҡурыу тип кенә ҡарай. Ә мин элекке осорҙо һағынам.

Вәлиә ИБРАҺИМОВА,
Дыуан районы:
— Яратам мин 1 Май һәм 9 Май байрамдарын! Яңы йыл үҙенсә матур булһа, был яҙ байрамдары икенсе төрлө йәмле һәм күңелле. Бөтә донъя йоҡоһонан уяна, йәшелләнә. Беҙ йыл һайын ғаиләбеҙ менән тауға менәбеҙ. Ҡаланан туғандар ҡайта. Бинокль алып тирә-яҡты күҙәтәбеҙ, фотоға төшәбеҙ. Балалар уйнап ҡыуана.