8–9 июндә Сибайҙа “Көньяҡ-көнсығыш райондар-2012” төбәк-ара инвестиция форумы үткәрелә.
Әлеге сарала һөҙөмтәле инвестиция сәйәсәте алып барыу алымдары хаҡында һөйләшеү, 2020 йылға илдә 25 миллион юғары етештереүсәнле эш урыны булдырыуға йүнәлтелгән “25–20” стратегияһын тормошҡа ашырыу буйынса тәҡдимдәр индереү ҡаралған.
Сибайға федераль һәм төбәк власть органдары, үҫеш институттары, бизнес-структуралар һәм йәмәғәт ойошмалары вәкилдәре, шулай уҡ Рәсәйҙең билдәле ғалимдары һәм эксперттары килеүе көтөлә. Программала пленар ултырыш, “түңәрәк өҫтәл”дәр үткәреү, экспозициялар ойоштороу ҡаралған.

“2011 йылда Башҡортостан Республикаһының иң төҙөк ҡала (ауыл) биләмәһе” республика конкурсына йомғаҡ яһалды һәм 11 майҙа республиканың Торлаҡ-коммуналь хужалыҡ министрлығы коллегияһының киңәйтелгән ултырышында еңеүселәр бүләкләнде.
Улар халыҡ һанына ҡарап биш категорияға бүленде. 70 меңдән күберәк кеше йәшәгән муниципаль берәмектәр араһында иң төҙөгө тип Октябрьский ҡалаһы танылды. Икенсе урында — Стәрлетамаҡ, өсөнсөлә — Салауат.
50 меңдән 70 меңгә тиклем халҡы булған ҡалалар араһында беренселекте Туймазы яуланы, икенсе һәм өсөнсө урындарҙы Ишембай менән Күмертау бүлеште.

Илдәге үҙгәртеп ҡороуҙар сауҙа өлкәһен дә урап үтмәне. Һөҙөмтәлә Башпотребсоюз ҡарамағындағы магазиндарҙың байтағы ярым буш ҡалды йәки ишектәренә йоҙаҡ эленде. Шулай ҙа ҡайһылары, заман ауырлыҡтарына бирешмәй, эшен дауам итә. Билдәле, ҡайҙа хужаһы йүнсел — шунда йәнләнде эш. Шуларҙың береһе — Бүздәк ҡулланыусылар йәмғиәте. Бөгөн ул аяғында ныҡ баҫып тора, бурысын тейешенсә атҡара һәм элекке данын һаҡлай икән, бында бер ниндәй сер ҙә, ғиллә лә юҡ. Ыңғай үҙгәрештәр етәксенең булдыҡлылығына, заман талабын аңлап эш итеүенә, бай тәжрибәһенә һәм берҙәм коллектив туплай алыуына ғына бәйле.
Район ҡулланыусылар йәмғиәтенә бына 15 йыл инде Клара Яфаева етәкселек итә. 1997 йылда уны идаралыҡтың рәйесе итеп һайлайҙар, артабан совет рәйесе булараҡ та үҙен һынатмай.

Башҡортостан Республикаһы Президенты Указы менән Ғ. Әлмөхәмәтов исемендәге Республика гимназия-интернаты педагогы Туйсина Рәшиҙә Ғилметдин ҡыҙы Салауат Юлаев ордены менән бүләкләнде.

Рәсәйҙә — яңы Президент. Хәйер, дүрт йыл элек был вазифала һигеҙ йыл эшләп алған Владимир Путинды яңы тип әйтеү бик дөрөҫ тә түгел. Һәр хәлдә ил халҡы сираттағы тапҡыр Владимир Владимировичҡа ышаныс белдерҙе һәм иң юғары вазифаға уны һайлап ҡуйҙы. Ә Дмитрий Медведев эшен Премьер-министр булараҡ дауам итә. Халыҡҡа нимә көтөргә? Ғөмүмән, Рәсәйҙең киләсәген нисек күҙаллайһығыҙ? Ошо һорауҙар буйынса айырым эксперттарҙың һәм халыҡ фекерен белештек.