Аҙна ыңғай булмаҡсы, әммә был уңышһыҙлыҡҡа осрамаҫһығыҙ тигәнде аңлатмай. Кәйефегеҙ яҡшы булыр, мажара эҙләрһегеҙ. Хеҙмәттәшлеккә бәйле эштәр һөҙөмтәле барыр. Фекерҙәштәрегеҙ менән теләһә ниндәй мәсьәләлә уртаҡ тел табыу еңелләшер.
Был аҙнала һәр кем лайыҡлы баһа алыр. Төрлө ҡатмарлыҡтағы яңы проекттарҙы тормошҡа ашырыу ҡыйынлыҡ тыуҙырмаҫ. Аптырап ҡалмағыҙ: үҙ эшегеҙҙе башлағыҙ, хосуси милек һатып алығыҙ, һөйгәнегеҙҙең йөрәген яулағыҙ. Бының өсөн, әлбиттә, иҫ китерлек ғәмәл уйлап сығарыу мөһим.
Аҙна башы рәсми эшмәкәрлек өсөн ҡулай, аҙағында иһә ял хаҡында ла уйлау фарыз.

Телевидениела барған “Экстрасенстар алышы” тапшырыуында еңеүселәрҙең береһе 2012 йылға фаразында, быйыл “индиго балалар” тыуасаҡ, тине. “Индиго” нимәне аңлата һәм бындай балаларҙы ниңә шулай атайҙар?

Бындай балаларҙы төрлө илдәрҙә төрлөсә атайҙар: Францияла — “тефлон балалар”, Бөйөк Британияла — “мең йыллыҡ балалары”, Рәсәйҙә — “яҡтылыҡ балалары”. Әммә иң таралғаны — “индиго балалар”. Ошондай балаларҙы тикшергәндә, уларҙың аураһының ҡарағусҡыл-күк — “индиго” төҫөндә булыуы асыҡлана. Әммә “индиго”ларҙың ябай балаларҙан айырмаһы бының менән генә сикләнмәй. Улар ҙур ижади көскә, ҡәтғилеккә, ныҡышмаллыҡҡа, юғары аҡыл ҡеүәһенә эйә. Традицион тәрбиә алымдары уларға тәьҫир итмәй. “Индиго балалар” һиҙемләү көсөнә таянып эш итә һәм ҡылыҡтарына аңлатма биреүҙе кәрәк тип тапмай.

Ай-һай, алыҫ Өфө менән Әбйәлил араһы! Был хәтлем юлды элегерәк ат менән, йәйәүләп нисек үткәндәрҙер, хәҙер иһә һәйбәт машина ла тәнде, йәнде ҡалдырмай. Архангел, Белорет тарафтарындағы тауҙарҙы ҡыҙырып, туғыҙ артылыш, туҡһан боролош үтеп килә торғас, ниһайәт, Абҙаҡ тирәһендә иркенгә килеп сығаһың. Һулда ҡалған Көркәк тауы, уңда, Ҡырҡты һыртында, суҡайып ултырған Ҡушай сусағы — тауҙар иле менән дала сигендәге ҡарауыл һымаҡ. Ошо тирәләге Ташбулат, Бикҡол, Күсем, Мораҡай ауылдары ла арҡаларын урманлы тауҙарға терәһә, тәҙрәләре менән гәлсәр күлдәргә, ҡылғанлы далаларға ҡарай. Тау, урман, дала Башҡортостандың һәр төбәгенә тиерлек хас мөхит булһа, күлдәр — ошо тауҙарҙың бәрхәт итәктәренә һибелгән көмөш тәңкә лә, һылыуҙар һәр саҡ ҡарап алыр көҙгө лә, Ер-әсәнең күккә баҡҡан күҙе лә. Ташбулат, күсемдәр, һәр хәлдә, йәйен-ҡышын шул күлдәрҙе теленән төшөрмәй, хатта уға табынып, илаһи ҡөҙрәт биреп йәшәй һымаҡ.

Башҡортостандың иң сибәр ҡыҙы хисле лә, сая ла
"Һылыуҡай-2012" гүзәллек конкурсында гран-при яулаған Ләйсән ҒАРИФЙӘНОВА, квадроциклда йөрөп, үҙе яҙған нәҫере менән күңел ҡылдарын сиртеп, тамашасыны әсир иткәйне. Былар —сибәр һәм аҡыллы ҡыҙҙың булмышының бер өлөшө генә. Тыуып үҫкән Миәкә районында шахмат буйынса чемпион булыуын, еңел атлетика менән шөғөлләнеүен, уҡыу йортоноң баскетбол буйынса йыйылма командаһында уйнауын, өс йәшендә уҡырға өйрәнеүен күптәр белмәйҙер әле. Әңгәмә ҡорғас, серле һылыуҡайҙың тағы әллә күпме һәләте барлығын асыҡланыҡ.
— Ләйсән, еңеүеңә нимә булышлыҡ итте, тип уйлайһың?
— Көйәрмәндәремә рәхмәтлемен. Конкурстың финалына Стәрлетамаҡтан бер автобус кеше ярҙам итергә килде.

“Әсәй менән гөл ултырттыҡ…”
Бынан бер нисә йыл элек беҙҙең ауылға ике балалы ғаилә ситтән күсеп килде. Килмешәктәр шунда уҡ үҙҙәрен башҡасараҡ тотоуы менән ауыл халҡының иғтибарын йәлеп итте. Тиҙҙән “йүкә телефон” уларҙың сектант икәнлеге тураһында хәбәр итте. Үҙ Аллаһына табынып, ит ашамай, үлән менән генә туҡланып, башҡа сәйер ғәҙәттәре менән аптыратып йәшәне улар. Ғаиләлә ике бала тәрбиәләнде. Ҡыҙҙары Кристина менән малайҙары Олег яңы мәктәпкә тиҙ өйрәнде. Шулай ҙа шуҡлыҡтары менән айырылып торҙолар.
Кристинаның холҡо VII-VIII класта уҡығанда үҙгәрә башланы. Ата-әсәһенең араһы боҙолоп, өйҙә көн һайын ыҙғыш сыға башлау быға төп сәбәпсе булғандыр. Өйҙә тыныс булмағас, уның ҡайтҡыһы ла килмәй, көнө буйы тышта йөрөүҙе хуп күрә ине.