Еңеү байрамы алдынан хеҙмәт һәм һуғыш ветерандарынан байтаҡ хат алдыҡ. Уларҙы уҡығандан һуң күҙ алдына илдең тотош тетрәндергес яҙмышы, халыҡтың Еңеү хаҡына фиҙаҡәрлеге, илһөйәрлеге, фажиғәһе күҙ алдына килеп баҫа.
Барлыҡ яҙмаларҙы ла тәфсирләп уҡыусылар иғтибарына еткерергә теләгебеҙ көслө булһа ла, гәзит майҙанының сикле булыуы сәбәпле, бөтөн авторҙарҙың да мәҡәләләрен байрам алдынан тулыһынса биреү мөмкин түгел. Өлкәндәр беҙҙе ғәфү итһен! Шулай ҙа беҙ уларҙың уртаҡ теләктәрен, тәҡдимдәрен уҡыусыларыбыҙ, йәмәғәтселек иғтибарына еткереүҙе мөҡәддәс бурысыбыҙ тип һанайбыҙ. Хат авторҙары өсөн Еңеү байрамы — тантаналы ла, юҡһыныулы ла, иҫтәлекле лә көн.

Шулай тип йөрөтәләр Ғәли Әхмәтшинды Ҡаранйылға ауылында. Ҡулынан килмәгән эше юҡ уның: санаһын да, даданын да эшләй, дуғаһын да бөгә. Йәнә бер яратҡан шөғөлө бар оҫтаның: ағастан бынамын тигән матур ултырғыстар үреү.
Уларҙы нисегерәк яһауы тураһында һорағас, Ғәли ағай былай тип һөйләне:
— Ултырғысты, ғәҙәттә, муйыл һәм йыла ағасынан бөгөп эшләйҙәр. Шулай уҡ уларҙың төҙөн, ботаҡһыҙын һайлау хәйерле. Оҙонлоғо метр ярымлыҡ ағас ботаҡтарын ҡырҡып алып ҡайтҡас, тәүҙә ҡабығын әрсергә кәрәк. Әҙерәк киптергәндән һуң уларҙы бөгә башлайһың. Сыбыҡтар формаға килтерелгәс, бер-береһенә беркетәһең. Бер ултырғысҡа 150 грамм самаһы 30-лы йәки 40-лы ҡаҙау ҡулланыла. Ултыра торған урынын йоҡа ғына йыла ағасы менән ҡаплайһың. Артабан әҙер ултырғысты төҫһөҙ лак менән буярға ғына ҡала.

Мәүлиҙә менән Зиннәт Юлбаевтарҙы, 60-ҡа аяҡ баҫыуҙарына ҡарамай, һис тә ололар рәтенә индереү мөмкин түгел. Әлбиттә, ғүмерҙең оҙонлоғон йылдар түгел, ә илеңә, ереңә, кешеләргә ҡылған яҡшы эштәрең, тәрбиәле балаларыңдың билдәләүе бөтәбеҙгә лә мәғлүм.
Тәрбиәле, татыу һәм берҙәм был ғаиләгә күрше-күлән, туған-тыумаса һоҡланып туя алмай. Ишек асып кем генә килеп кермәһен, Мәүлиҙә апай яҡты йөҙ менән ҡаршы ала, бер кемде лә йомошон йомошламай сығармай. Баҫалҡы, ипле, аш-һыуға оҫта, аҙ һүҙле булыуы менән йәштәргә лә, ололарға ла өлгө. Пенсияға сыҡҡансы иртә таңдан ҡараңғыға тиклем колхоз эшенән ҡалмаған Зиннәт ағай менән Мәүлиҙә апайға бер-бер артлы донъяға килгән ир балаларҙы үҫтереп, аяҡҡа баҫтырыу еңелдән булмағандыр.

1964 йылдан Аҡъяр балалар йортонда тәрбиәләндем, шунда алты йыл белем алдым. Бала саҡтың матур осоро булып хәтерҙә ҡалған ул ваҡыттар. Бик татыу, дуҫ йәшәнек. Шул йылдар һағындырып иҫкә төшә.
Ул саҡта әсәй урынына күргән тәрбиәсебеҙ Ғәтифә апай бөгөн Үрген ауылында йәшәй. Уның менән ай һайын тигәндәй осрашып торабыҙ. Балалар йортонан төрлөбөҙ төрлө яҡҡа таралышыуға быйыл 40 йыл булды. Ошо ыңғайҙан май айында Аҡъярҙа осрашырға һөйләштек. Рәмзиә, Зифа һәм Фәриҙә Баймаҡ ҡалаһында йәшәй. Зөбәйҙәбеҙ — Магнитогорскиҙа. Бер нисә ҡыҙыбыҙ Аҡъярҙың үҙендә донъя көтә, Алмабикә — Ырымбур өлкәһенең Поповка ауылында, Рәғиҙә — Әбйәлилдә, Ләлә — Шишмә районында. Ә ҡалғандарының ҡайҙа икәнлеген белмәйем.

Ата-әсә өсөн балаһы тураһында йылы һүҙ ишетеүҙән дә ҙур шатлыҡ юҡтыр. Яңыраҡ Ҡаһарман ауылында йәшәүсе Рима Йосоп ҡыҙы менән Вәкил Камал улы Ирғәлиндәр ғаиләһенә лә ошондай йылы сәләм һүҙҙәре килгән. Уны улдары Йәмил хеҙмәт иткән часть командиры яҙған.
Хатта былай тиелә: “Һеҙгә улығыҙ Ирғәлин Йәмил Вәкил улының хәрби бурысын намыҫлы үтәүе, ҡорал һәм техника менән оҫта эш итеүе, хәрби уҡыу һәм хеҙмәт ваҡытында тырышлыҡ, һөнәри оҫталыҡ күрһәтеүе тураһында тәрән ҡәнәғәтлек менән хәбәр итәм. Хеҙмәттәштәре һәм бүлексә командирҙары араһында хөрмәт ҡаҙанды.
Һеҙ лайыҡлы рәүештә улығыҙ менән ғорурлана алаһығыҙ”.