Үткән аҙнаның мөһим сәйәси ваҡиғалары булып Иран, Сүриә тирәләй хәл-ваҡиғаларҙың һаман да киҫкен ҡалыуы, АҠШ-тың ошо илдәргә ҡарата үҙ позицияһын белдереүе, Рәсәйҙең БДБ илдәрен үҙ “ҡанаты” аҫтында тоторға тырышыуы, илебеҙҙә сәйәси реформа башланыуы торҙо.
Һуғышҡа аҡса йәлләмәйҙәр
Сүриәгә Ғәрәп илдәре лигаһы һәм БМО-ның махсус вәкиле Кофи Аннан барып ҡайтҡандан һуң ил президенты Бәшәр Әсәд һәм оппозиция араһындағы конфликт яйланырға, һуғыш уты туҡталырға тейеш ине. Әммә һаман да тыныслыҡ урынлашмаған әле. Килешеүгә ярашлы, 10 апрелдән һуң ике яҡ та һуғышты туҡтатырға тейеш. Үткән аҙнала Истанбулда Сүриә конфликтын көйләү буйынса “Сүриә дуҫтары төркөмө” конференцияһы булып үтте. Рәсәй менән Ҡытай был конференцияла ҡатнашыуҙан баш тартты.

Башҡортостан Республикаһында Кеше хоҡуҡтары буйынса вәкил Рим ҠӘЙҮМОВтың Дәүләт Йыйылышы — Ҡоролтайҙағы йыллыҡ доклады
Башҡортостан Республикаһы Дәүләт Йыйылышы — Ҡоролтайға тәҡдим ителгән йыллыҡ доклад “Башҡортостан Республикаһында Кеше хоҡуҡтары буйынса вәкил тураһында”ғы Закондың 20-се статьяһына ярашлы әҙерләнде. Докладта граждандарҙың хоҡуҡтарын һәм азатлыҡтарын яҡлауҙың ижтимағи әһәмиәткә эйә булған төп проблемалары сағылдырылды.
Башҡортостан Республикаһы Конституцияһының 11-се статьяһы республиканы кешенең лайыҡлы тормошон һәм ирекле үҫешен тәьмин итеүсе шарттар тыуҙырыуға йүнәлтелгән социаль дәүләт булараҡ билдәләй.
Граждандарҙың Конституцияла нығытылған хоҡуҡтарын һәм азатлыҡтарын тормошҡа ашырыу өсөн республиканың власть органдары тарафынан тейешле шарттар тыуҙырылған, ошо хоҡуҡтарҙы ғәмәлгә ашырырға мөмкинлек биргән механизмдар һәм алымдар булдырылған.

5 апрелдә Мәскәүҙә Башҡортостан Президенты Рөстәм Хәмитов Дәүләт Думаһы Рәйесе, Рәсәйҙең инновациялы төбәктәре ассоциацияһының күҙәтеү советы рәйесе Сергей Нарышкин етәкселегендә үткән ултырышта сығыш яһаны. Башҡортостан Президентының матбуғат хеҙмәте ошо хаҡта хәбәр итте.
Ултырышта Рөстәм Хәмитовтың Башҡортостандың Рәсәйҙең инновациялы төбәктәре ассоциацияһына инеүе тураһындағы башланғысы ҡаралып, был тәҡдим хуплау тапты.
Республика башлығы, Башҡортостан — иҡтисади яҡтан алға киткән, ҡеүәтле төбәк, тип билдәләне.
— Республикала сәнәғәт һәм фән үҫешкән, — тине ул. — Һуңғы йылда тейешле закондар базаһын булдырыу йәһәтенән дә ярайһы уҡ алға киттек: инновация эшмәкәрлеге тураһындағы закон, предприятиеларҙың инновация әүҙемлеген үҫтереүгә йүнәлтелгән норматив акттар ҡабул ителде.

Башҡортостан Республикаһының эске эштәр министры Михаил Закомалдин быйылғы йылдың беренсе кварталына йомғаҡ яһаны. Матбуғат саралары хәбәрселәре күп булыу сәбәпле, кәңәшмәләр залы тулы ине. Был, әлбиттә, полиция хеҙмәте тураһында ҡуйырғандан-ҡуйырған имеш-мимеш хәбәрҙәргә бәйле. Күптәрҙе эш һөҙөмтәләре түгел, ә Интернет селтәрендә яҙылған хаттар, үҙәк телевидение аша үткән тапшырыуҙарға министрҙың ҡарашы ҡыҙыҡһындырҙы.
Рәсәй Федерацияһының 16 субъектында ғына полицияның эше юғары баһаланған, шул иҫәптән Башҡортостанда ла. Республика халҡының 53 проценты хоҡуҡ һаҡлау хеҙмәткәрҙәренең эшенә ыңғай ҡарай. Республикалағы оператив хәл тотороҡло. Дөйөм енәйәтселектең һаны кәмегән. Һуңғы өс ай эсендә 17 590 енәйәт ҡылынған, шуларҙың 4 795-ен ауыр һәм үтә ауыр енәйәттәр тәшкил итә. Урам буйҙарында, йәмәғәт урындарында ҡылынғандарының һаны кәмеүе ҡыуандыра. Ә бына наркотиктарға бәйле енәйәттәрҙең һаны артҡан һәм 1 200-гә еткән.

Һуңғы арала Рәсәй менән Америка ҡайһы бер мәсьәләләр буйынса килешеүгә килә алмай йонсой. Тәү сиратта, был Американың Европала ПРО системаһын урынлаштырырға тырышыуы менән бәйле. Рәсәй быны үҙенә янау тип иҫәпләһә, АҠШ, Яҡын Көнсығышҡа ғына тоҫҡаласаҡ, ти. Ошондай шарттарҙа ике дәүләттең дошманлашып китеүе лә бар, тигән һүҙҙәр ҡуйыра. Был хаҡта политологтарҙың һәм ябай халыҡтың фекерен белештек.