2012 йылдың 1 ғинуарынан “Юридик шәхестәрҙең айырым төрҙәре тарафынан тауарҙар, эштәр, хеҙмәттәр һатып алыу тураһында”ғы 223-сө Федераль закон көсөнә инде.
Ул юридик шәхестәрҙең айырым төрҙәре, шул иҫәптән тәбиғи монополиялар субъекттары, дәүләт (муниципаль) унитар предприятиелары, автономлы учреждениелар, устав капиталында дәүләт (муниципаль) ҡатнашлығы өлөшө 50 проценттан юғарыраҡ булған хужалыҡ йәмғиәттәре, шулай уҡ юридик шәхестәрҙең бүлендек йәмғиәттәре тарафынан тауарҙар, эштәр һәм хеҙмәттәр һатып алыуҙы яйға һала.

Башҡортостан Хөкүмәтенең матбуғат хеҙмәте хәбәр итеүенсә, республика Хөкүмәтенең “Башҡортостан Республикаһының Инвестиция фонды тураһында”ғы ҡарарына ҡул ҡуйылды.
Фонд бюджет ассигнованиелары иҫәбенә ойошторола. Аҡса төбәк һәм төбәк-ара әһәмиәттәге проекттарҙы тормошҡа ашырыуға тотоноласаҡ. Өҫтөнлөклө инвестиция проекттарын ҡарау һәм уларға булышлыҡ итеү буйынса республика комиссияһы ошо проекттарҙы һайлап алыу менән шөғөлләнәсәк.
Проекттарҙы тормошҡа ашырыуға Башҡортостандың Иҡтисади үҫеш министрлығы контроллек итәсәк.

Башҡортостан Президенты Рөстәм Хәмитов үҙенең советнигы Андрей Назаровты Башҡортостан Республикаһы Президентының инвестиция хеҙмәттәшлеге мәсьәләләре буйынса махсус вәкиле итеп тәғәйенләне.
Был ҡарар инвестиция йәлеп итеү һәм инвестиция проекттарын тормошҡа ашырыу эшмәкәрлеген камиллаштырыу маҡсатында ҡабул ителде.
Башҡортостан Республикаһы Президентының инвестиция хеҙмәттәшлеге мәсьәләләре буйынса махсус вәкиле Мәскәү ҡалаһында эшләйәсәк.

Кисә Нефтекама ҡала округы Советы ултырышы булды. Ҡала Советы депутаттарының ҡарары менән Владимир Громов, икенсе эшкә күсеү сәбәпле, вазифаһынан бушатылды.
Нефтекама ҡалаһы хакимиәте башлығы вазифаһын ваҡытлыса башҡарыу Илүс Ғарифуллинға йөкмәтелде.

Башҡортостан Дәүләт Йыйылышы – Ҡоролтайҙың 46-сы ултырышында республика бюджетына дүртенсе тапҡыр үҙгәреш индерелде. Ул ҡаҙнаға килемдәр инеүе планын арттырыу, федераль бюджеттан 2 миллиард 740,4 миллион һум күләмендә финанс ярҙамы күсеү кеүек сәбәптәргә бәйле.
Шулай уҡ Башҡортостандағы муниципаль вазифалар реестры хаҡында закон проекты ҡаралды, ул районда йәки ҡалала иҫәп палатаһы булдырыу мөмкинлеген бирә. Депутаттар фермер хужалыҡтарын үҫтереүгә, тирә-яҡ мөхитте һаҡлауға, туристик эшмәкәрлеккә һәм мәҙәни мираҫҡа ҡағылышлы илдең бүтән төбәк парламенттары индергән закон сығарыу башланғыстарын да хупланы. Такси тураһында ҡануниәт, ниһайәт, ҡабул ителде.