Йәм һәм йән өҫтәй

16-01-2018, 00:03 // Рухиәт // Баҫып сығарырға
Йәм һәм йән өҫтәйМәҙәниәтһеҙ тормошобоҙҙо күҙ алдына килтереп тә булмай: ул беҙгә йәм һәм йән өҫтәй, матурлыҡҡа өндәй. Юҡҡамы ни, мәҙәниәт – тормош көҙгөһө, тип әйтмәйҙәр. Әммә, нисек кенә булмаһын, тап ошо өлкәләге барлыҡ сараларҙың нисек үтеүе һәм ойошторолоуы унда эшләүсе хеҙмәткәрҙәрҙең ижади эҙләнеүҙәренән, үҙ эшенә нисек ҡарауҙарынан тора. Был тәңгәлдә Аҡъяр мәҙәниәт йорто директоры Ольга Шорохованы күптәргә өлгө итеп ҡуйырлыҡ. “Үҙ эшенең оҫтаһы”, тиҙәр уның хаҡында. Ысынлап та, бар ғүмерен мәҙәниәткә арнаған, бар булмышын һәм күңелен яратҡан эшенә биреүселәр беҙҙең арала бик һирәк осрай.


Ольга Владимировнаға Хоҙай матурлыҡты ла, талантты ла мул өләшкән. Сибәр ханым сәхнәгә сығып башҡорт һәм рус йырҙарын башҡарғанда, күптәрҙе уның ниндәй милләттән булыуы ҡыҙыҡһындыра. Шулай булмайса, мәрйә ҡыҙы рәхәтләндереп башҡорт моңон яңғыратһын әле! Шуға күрә әңгәмәсем менән аралашҡанда тәүге һорауым да күптәрҙе ҡыҙыҡһындырған теманан башланды.
– Ысынлап та, рус милләтенән булыуыма ҡарамаҫтан, ҡасан өйрәнгәнмендер, әйтә алмайым, мин башҡортса яҡшы аралашам. Үҙем Аҡъяр ауылында тыуып үҫтем, башҡорт балалары менән бергә садикка йөрөнөк, әхирәтем Гөлназ менән “уныңса”, йәғни башҡортса һөйләшергә тырыша торғас, үҙем дә башҡорт булып киттем шикелле. Киреһенсә, телде белеүем файҙаға ғына, төрлө милләт йәшәгән өлкәлә эшләйем. Ҡыҙыҡ хәлдәргә лә тарығаным бар: күптәр минең башҡортса белгәнемде аңғармай, һөйләп тә ҡуя. Мин бит уларҙы ҡыҙыҡһынып, һоҡланып тыңлайым, – тип йылмая Ольга Шорохова.
Бала саҡтан мәҙәниәткә ынтылған ҡыҙ дүртенсе класта уҡығанда ата-әсәһенең ризалығынан тыш музыка мәктәбенең баян класына йөрөй. Бер нисә айҙан һуң ғына ҡыҙҙарының тырышып баян уйнауын белгән ата-әсәһе уға баян һатып алып бирә. Бар яҡлап тырыш Ольга Шорохова, мәктәпте тамамлағас, аттестат менән бер юлы музыка мәктәбенән дә таныҡлыҡ алып сыға. Тап шул документ менән Садовый ауылы мәктәбендә музыка уҡытыусыһы һәм педагог-ойоштороусы булып эш башлай.
Бер йылдан һуң Стәрлетамаҡ мәҙәни-ағартыу техникумының хор бүлегенә уҡырға керә. Диплом алды практикаһын үҙенең тыуған яғында үтә һәм ... эшкә саҡырыу ала.
Ҡулына диплом тотоп, ҡанатланып ҡайтып, район мәҙәниәт йортонда эш башлай. Методика кабинеты етәксеһенән алып район мәҙәниәт йорто директоры вазифаһына тиклем күтәрелә. Тап уның инициативаһы һәм тырышлығы менән мәҙәниәт йортонда төрлө йүнәлештәге ансамблдәр барлыҡҡа килә, ауыл клубтарының эше йәнләнә, райондың бренды булырлыҡ төрлө мәҙәни саралар, конкурстар үтә. “Хәйбулла – тыуған яғым”, “Бөйөк дала” рок фестивалдәре, “Хәйбулла-шоу”, Сәйфулла Дилмөхәмәтов исемендәге ҡурайсылар бәйгеһе кеүек район, республика, төбәк-ара конкурстар булһынмы, һәр ауыл клубының махсус үҙенә генә хас брендлы сараларымы йәки ансамблдәрҙең сығыштарымы – һәммәһенә Ольга Шорохова үҙенең күңелен һалып ярҙам итә, кәңәштәрен бирә, һәр башланғыстың башында тора.
Һуңғы йылдарҙа халҡыбыҙҙың онотола барған йолаларын ҡайтанан тергеҙеү, уларҙы һаҡлау, йәш быуынға еткереү маҡсатында районда төрлө эш башҡарыла. Мәҫәлән, Вәзәм ауылында һуҡма шәл кәсебе тергеҙелһә, Маҡан ауыл клубында “Журавушки” вокаль ансамбле рус халҡының боронғо йыр һәм таҡмаҡтарын тамашасылар күңеленә еткерә.
Етәксе булараҡ, Ольга Владимировна талапсан да, ғәҙел дә. Ул үҙенең хеҙмәткәрҙәренең эшен баһалап, ситтән күҙәтеп кенә ҡалмай, уларға бар яҡлап ярҙам күрһәтә. Төрлө һорауҙар менән барыһы ла уға кәңәш һорап килә, уның фекерҙәренә таяна, аҡыллы һүҙҙәренә ҡолаҡ һала. Мәҙәниәт өлкәһендә яңғыҙ эшләп булмай, һинең идеяңды, башланғысыңды күтәреп алыу­сылар табылмаһа, эшең дә күренмәй. Был йәһәттән Хәйбулланың мәҙәниәт хеҙмәткәрҙәре берҙәм, дәртле һәм сәмле. Ниндәй генә саралар үткәрмәһендәр, һәр саҡ ҡатнашыусылар ҙа, уны дауам итеүселәр ҙә табыла.
Әйткәндәй, быйылғы йыл Ольга Шорохова өсөн бигерәк тә уңышлы булды. Ул – Бөтә Рәсәй “Ҡатын-ҡыҙ-директор” конкурсы һәм республика буйынса “Йыл директоры” бәйгеләре еңеүсеһе. “Сулпан” халыҡ вокаль ҡатын-ҡыҙҙар ансамбле ағзаһы, Аҡъяр мәҙәниәт йорто директоры, “Башҡортостан урыҫтары Соборы”ның Хәйбулла районы ойошмаһы етәксеһе Ольга Шорохова райондың барлыҡ мәҙәни сараларының уртаһында ҡайнап ҡына ҡалмай, уларға йәм һәм ҡот та өҫтәй.
Хәләл ефете бик иртә вафат булыуға ҡарамаҫтан, улы Виталийға яҡшы тәрбиә бирә. Бөгөн ул – Өфө дәүләт нефть техник университетының икенсе курсы студенты. Йыр-моңға ғашиҡ, гитарала уйнай. “Сәхнә ене ҡағылған” геройымдың яулар уңыштары алда әле.