Ҡасандыр яратышып өйләнешеп тә, тормош юлы буйлап бергә атлай алмаған, ғаиләләре тарҡалған кешеләр бихисап. Ҡыҙғанысҡа ҡаршы, ғаилә фажиғәһендә иң ҙур зыян күреүселәр – балалар: беренсенән, үҙ мәшәҡәттәренә батҡан өлкәндәр уларға иғтибар бүлмәй, икенсенән, ғәҙәттә, әсә ҡарамағында ҡалған сабыйҙы матди яҡтан тәьмин итеүҙә ҡайһы бер атайҙар бөтөнләй ҡатнашмай. Алимент юллау ҙур алышҡа әүерелә, кешеләрҙең шәхси тормошона суд приставтары ҡыҫыла...
Ҡыҙғанысҡа ҡаршы, күп осраҡта яуапһыҙ атайҙың бурысын ҡайтарыуҙы тап ошо юл менән башҡарырға тура килә – был һәм башҡа мөһим мәсьәләләр буйынса Федераль суд приставтары хеҙмәтенең Башҡортостан буйынса идаралығы етәксеһе Зариф Байғусҡаров матбуғат конференцияһында үҙенең фекерен белдерҙе.

Башҡортостанда эш хаҡы буйынса бурыс күләме кәмене, тип билдәләй республиканың Дәүләт хеҙмәт инспекцияһы.
1 майға 15 эш биреүсенең хеҙмәткәрҙәре алдында бурысы булған. 3393 кеше эш хаҡын ваҡытында ала алмаған. Бурыс күләме, йыл башынан алып өс тапҡырҙан ашыуға кәмеп, 34,1 миллион һум тәшкил иткән.
— Күҙәтеү һәм хоҡуҡ һаҡлау органдарының, профсоюздар һәм власть органдарының эш хаҡы буйынса бурысты кәметеү буйынса эше республика Хөкүмәте тарафынан контролдә тотола, — тине хеҙмәт инспекцияһы етәксеһе вазифаһын башҡарыусы Андрей Цибизов. — Башҡортостан Республикаһы Дәүләт Йыйылышы — Ҡоролтайҙың депутаттар төркөмө бурысты бөтөрөү саралары хаҡындағы отчетты даими тыңлай. Эш хаҡы буйынса совет ағзалары ла был эшкә ҙур тырышлыҡ һалды.

Учалы районы хакимиәтендә “2013 йылға тиклем ауылды социаль үҫтереү” айырым маҡсатлы федераль программа буйынса таныҡлыҡтар тапшырыу тантанаһы үтте.
Хакимиәт башлығының беренсе урынбаҫары, ауыл хужалығы бүлеге начальнигы Әҙип Ҡарамышев социаль өлкәлә һәм ауыл хужалығы предприятиеларында эшләгән биш йәш ғаиләгә дәүләт ярҙамы күрһәтеү тураһында документтар тапшырҙы, тип хәбәр итә мәғлүмәт-аналитика бүлеге.
— Ауыл хужалығын һәм ауылды үҫтереү — бөгөн республика, район етәкселеге эшмәкәрлегендә өҫтөнлөклө йүнәлеш, — тине Әҙип Ҡарамышев. — Былтыр ошо программаға ярашлы 14 ғаиләгә 9 миллион һумдан ашыу күләмдә субсидия бирелде.

Рәсәй Президентының Башҡортостандағы ҡабул итеү бинаһында Бөйөк Ватан һуғышы ветерандары менән тыл эшсәндәре күтәргән мәсьәләләрҙең күбеһе торлаҡҡа ҡағылды.
Башҡортостан буйынса Баш федераль инспекторҙың матбуғат хеҙмәтенән хәбәр итеүҙәренсә, ветерандарҙың береһе коммуналь фатирҙа сит кешеләр менән көн итеүгә зарланған. 90 йәшен тултырған яугир инвалид күршеләренең бөткөһөҙ низағынан, шау-шыуҙан, тәртипһеҙлектән арыған. Күп тапҡыр мөрәжәғәт итеүенә ҡарамаҫтан, мәсьәлә әле булһа хәл ителмәгән.

Рәсәй Президенты В. Путиндың яңы вазифаһындағы тәүге указдарының береһе Бөйөк Еңеүҙең 67 йыллығына бәйле һуғыш ветерандарына ҡағылышлы булды. Май һәм июндә уларға бер тапҡыр өҫтәмә түләү биреләсәк.
Һуғыш инвалидтарына һәм яуҙа ҡатнашҡандарға, һәләк булып ҡалғандарҙың, вафат булған инвалидтарҙың тол ҡатындарына, ҡамауҙағы Ленинградта йәшәгәндәргә, һауа һөжүменә ҡаршы объекттар һәм оборона ҡоролмалары төҙөлөшөндә эшләүселәргә, фашизм тотҡонлоғон кисергән бәлиғ булмағандарға 5 мең һум күләмендә өҫтәмә бирелә.