Торлаҡты сафҡа индереү буйынса айырым маҡсатлы республика программаһында билдәләнгән күрһәткестәргә өлгәшеү өсөн муниципаль берәмектәр хакимиәттәренә кисекмәҫтән үҙҙәренең торлаҡ программаларын эшләп бөтөрөргә кәрәк. Шунһыҙ республиканың торлаҡты сафҡа индереү планына хәүеф янай. 2013 йылдан был пландың ҡырҡа артыуын да иҫәпкә алыу талап ителә.
Башҡортостандың Төҙөлөш һәм архитектура буйынса дәүләт комитетының былтыр февралдә үткәрелгән коллегияһында муниципаль берәмектәргә 2015 йылға тиклем торлаҡ төҙөлөшөн үҫтереүҙең муниципаль программаларын эшләүҙе 2011 йылдың 1 майына тиклем тамамларға тәҡдим ителгәйне.

Өфөнөң Иван Якутов исемендәге паркына балалар тимер юлы өсөн яңы тепловоз килтерелде. Локомотив 10 миллион һумға төшкән. Ярты быуаттан ашыу яҡшы хеҙмәт иткән иҫке тепловоз иһә Һамарҙағы тимер юл музейына ҡуйыласаҡ.
Өфөнөң балалар тимер юл вокзалы директоры Ғәббәс Садиҡов әйтеүенсә, яңы тепловоз ышаныслы һаҡ аҫтында. Уға йәй балаларҙы йөрөтәсәк биш вагон тағылған.
Әле йәш тимер юлсылар яңы 59-сы миҙгелде тулы әҙерлек менән ҡаршылау өсөн тәжрибәле остаздар етәкселегендә белем ала.

Башҡортостан Республикаһы Хөкүмәтенең 2011 йылдың 30 декабрендәге ҡарары менән ауыл хужалығы тәғәйенләнешендәге ерҙәргә дәүләт кадастр баһаһы һөҙөмтәләре раҫланды. Республика Хөкүмәтенең матбуғат хеҙмәте ошо хаҡта хәбәр итте.
Был һөҙөмтәләргә ауыл хужалығы тәғәйенләнешендәге ерҙәрҙең, ер участкаларының кадастр хаҡы күрһәткестәре индерелде.
Ҡарар 2012 йылдың 1 ғинуарынан көсөнә инде.

Яңы йыл башланыу менән “йолаға әүерелгән” тарифтар артыуы быйыл йәйгә тиклем кисектерелә.
Газға, электрға һәм йылылыҡ энергияһына хаҡ, ғәҙәттәгесә, 1 ғинуарҙан түгел, ә 1 июлдән артасаҡ, тип аңлата Башҡортостан Республикаһының Тарифтар буйынса дәүләт комитеты рәйесе урынбаҫары Алексей Овчинников.
Быға тиклем, “Башинформ” хәбәр итеүенсә, хаҡ күтәрелеүҙең ярты йылға кисектерелеүе хаҡындағы ҡарар Рәсәй Федерацияһы Хөкүмәте тарафынан ҡабул ителгән.

2011 йыл республиканың социаль өлкәһе өсөн үтә мәшәҡәтле лә, уңышлы ла булды. Һәр тармағында заман менән бергә атлауыбыҙҙы, яңы һулышты тойҙоҡ. Республика башлығы тарафынан ошо йылға билдәләнгән бурыстар, халыҡтың йәшәү кимәлен күтәреү маҡсатындағы саралар бер-бер артлы тормошҡа ашырылды. Әлбиттә, быға республика бюджетының социаль йүнәлешле булыуы ла булышлыҡ итте.
Былтыр йыл башынан хеҙмәткә түләүҙең минималь күләмен 5500 һумға еткереү — һүҙҙең эш менән нығытылыуына аныҡ миҫал. Әйткәндәй, Рәсәйҙә был күрһәткес 4611 һум тәшкил итә. Хеҙмәткә түләүҙең минималь кимәлен күтәреүҙең һөҙөмтәһе бай һәм фәҡирлек сигендә йәшәүселәрҙең килеме араһындағы айырманың бер ни тиклем ҡыҫҡара башлауында ла сағылды.