Главная > Социаль мәсьәлә, Анонстар > Ғаилә ҡото – тормош һуты

Ғаилә ҡото – тормош һуты


15-12-2017, 00:09. Разместил: adminka
Ғаилә ҡото – тормош һутыБашҡортостан Хөкүмәтенең сираттағы ултырышында Республика Башлығы Рөстәм Хәмитов 2018 йылды Ғаилә йылы тип атарға тәҡдим итте һәм тиҙҙән ошо туралағы Указға ҡул ҡуясағын белдерҙе. Киләһе йыл тағы ла ниндәй үҙгәрештәр вәғәҙә итә, иң мөһиме – социаль һәм иҡтисади үҫеш нисек күҙаллана?

– Бөгөнгө сарала эште программалы һәм маҡсатлы алып барыуға, республиканың иҡтисади үҫешенә ҡағылышлы етди мәсьәләләр тикшерелә, – тине Рөстәм Зәки улы. – Беҙҙең төбәктең 2030 йылға тиклемге социаль-иҡтисади үҫеш стратегияһын раҫлау – үтә яуаплы мәл. Ошо документ өҫтөндә эшләү ҡатмарлы булды һәм ҙур хеҙмәт талап итте. Беренсе тапҡыр беҙ бындай документты әҙерләүгә респуб­ликаның ғилми коллективтарын ғына түгел, ә “Сколково” эксперттарын, киң йәмәғәтселекте һәм эшҡыуарлыҡ даирәһен дә йәлеп иттек.
Был йәһәттән өҫтөнлөклө йүнәлештәр итеп иҡтисадтың реаль өлкәһен нығытыу, кеше капиталын үҫтереү һәм республика райондарының үҫешендәге тигеҙһеҙлекте бөтөрөү билдәләнә. “Стратегия-2030” ҡуйған бурыстарҙы уңышлы үтәү властың, эшҡыуарлыҡтың һәм йәмәғәтселектең берҙәм хәрәкәт итеүенә бәйле”, – тине Башлыҡ.
Ултырышта ҡаралған тағы бер мөһим мәсьәлә урта һәм бәләкәй эшҡыуарлыҡты 2030 йылға тиклем үҫтереүгә ҡағыла, был документ әлеге Стратегияны тулыландыра һәм эшҡыуарлыҡ унда иҡтисадты үҫтереүҙең иң төп таяныстарының береһе тип иғлан ителгән.
– Граждандарҙың эшҡыуарлыҡ башланғысы беҙҙең өсөн һәр саҡ мөһим өҫтөнлөктәрҙең береһе булды, – тип дауам итте Рөстәм Хәмитов. – Эшҡыуарлыҡтың иҡтисадтағы һәм социаль өлкәләге өлөшөн арттырыу беҙ теләгәнсә тиҙ бармай, ләкин ошо йүнәлештә маҡсатлы рәүештә алға барабыҙ. Бөгөн бәләкәй эшҡыуарлыҡ республикалағы тауар әйлә­нешенең яртыһы самаһын һәм төбәк тулайым продуктының өстән бер өлөшөн тәьмин итә. Мәшғүл халыҡтың сирек өлөшө ошондай предприятиеларға тура килә. Быйыл бәләкәй эшҡыуарлыҡ субъекттары дүрт меңгә артып, 140 мең тәшкил итә. Был үҫеш 2015 йылдан башланды һәм йыл һайын беҙҙең иҡтисадта 4-5 мең яңы бәләкәй компания өҫтәлә.
Көн тәртибендә балалы ғаиләләрҙе яҡлау мәсьәләһе тороуын иҫәпкә алып, Башҡортостан Башлығы 2018 йылды республикала Ғаилә йылы тип билдәләү тураһындағы Указ әҙерләнеүе хаҡында белдерҙе. Был Рәсәй Президенты Владимир Путин иғлан иткән Балалар ун йыллығының бурыстарына ла тап килә. Беҙҙең төбәктә балалы ғаиләләргә ярҙам йөҙөнән ҡаҙнанан 10 миллиард һум бүленә, һәм был эш федераль кимәлдә лә юғары баһаланды.


Вернуться назад