ФАП ябыҡ, белгестәр етмәй08.11.2018
Башҡортостанда 2064 фельдшер-акушерлыҡ пунктының 125-е белгестәр етешмәү сәбәпле ябылған. Шул уҡ ваҡытта 72 пункт авария хәлендә, 152-һендә иһә шәфҡәт туташтары ғына эшләй. ФАП-тарҙың 80 проценты ҡуртымға алынған биналарҙа урынлашҡан. Дәүләт Йыйылышы – Ҡоролтайҙың һаулыҡ һаҡлау, социаль сәйәсәт һәм ветерандар эштәре комитеты ултырышында республика һаулыҡ һаҡлау министры вазифаһын башҡарыусы Рафаэль Яппаров ошондай мәғлүмәт бирҙе.

Әле 108 ауылдағы 5300 кешегә күсмә ФАП-тар ярҙам күрһәтәсәк. Ете биләмәлә федераль ҡаҙна аҡсаһы иҫәбенә модулле фельдшер-акушерлыҡ пункттарын асыу ҡарала.

Тармаҡтағы тағы ла бер етди проблема – кадрҙарға ҡытлыҡ. Былтыр 1770 белгес килһә, 1433 табип эштән киткән. Медицина хеҙмәткәрҙәренең 23 проценты – пенсия йәшендәгеләр. ФАП-тарҙа иһә был һан тағы ла юғарыраҡ – 40 процент.

“Ауыл табибы” программаһы буйынса эшкә йәлеп ителгән 170 табип хеҙмәт килешеүен тарҡатҡан, 23-ө биш йыллыҡ контракттың ваҡыты үтеү менән эштән киткән. Рафаэль Яппаровтың фекеренсә, белгестәрҙе ауылда ҡалдырыу өсөн торлаҡ мәсьәләһен хәл итеү, йорт һалыуға йәки фатир һатып алыуға субсидия биреү зарур.


Вернуться назад

Яндекс.Метрика