Шәп башланды. Нисек тамамланыр?

19-06-2018, 00:03 // Спорт һәм туризм // Баҫып сығарырға
Шәп башланды. Нисек тамамланыр?14 июндән 15 июлгәсә Рәсәйҙә оло спорт сараһы – Футбол буйынса донъя чемпионаты бара. 32 команда тәүҙә үҙ төркөмдәрендә, һуңынан һәр береһенән икешәр иң яҡшыһы плей-офта еңеүсене билдәләйәсәк. Беҙҙең ил уйынсылары, хужалар булараҡ, был турнирға туранан-тура эләкте.

Рәсәй спортсылары уйнаған А төр­көмөндә йәнә Сәғүд Ғәрәбстаны, Египет, Уругвай вәкилдәре бар. Тәүге матчтар уҙҙы ла инде. Шуныһы һөйөнөслө: ватандаштарыбыҙ иң беренсе дәғүәсене – ғәрәптәрҙе – 5:0 иҫәбенә ҡыйратты. Әммә шатланырға иртәрәк. Беҙ һәйбәт башлаһаҡ та, аҙағы насар тамамлана торған. Бөгөн Египетҡа ҡаршы икенсе уйын барыһын да күрһәтер...
Йыйылма команда тураһында ни әйтергә була? Коллектив яңы. Беҙ күреп өйрәнгәндәрҙән элек ҙур ярыштарҙа ҡатнашҡан Игорь Акинфеев, Сергей Игнашевич, Юрий Жирков, Алан Дзагоевты телгә алырға мөмкин. Әйткән­дәй, Алан тәүге матчта уҡ етди йәрәхәт алырға өлгөрҙө. Артабан уйнармы-юҡмы икәне билдәһеҙ. Һуңғы йылдарҙа мөһим турнирҙарҙа уны ошондай бәлә һағалап ҡына тора. Командала бразил милләтле уйынсыбыҙ ҙа бар – Марио Фернандес. Ул – хәҙер Рәсәй гражданы. Тағы бер иғтибар талап иткән футболсы – ил беренселегендә тотороҡло ғына уйнамаған Артем Дзюба. Шулай ҙа был ҡырыҫ холоҡло һөжүм итеүсе бик кәрәк. Ундай эре кәүҙәле форвард дәғүәсе ҡапҡаһы алдындағы көс һынашыуҙарҙа алмаштырғыһыҙ.
...Египеттың һөжүм итеүсеһе Мөхәмәт Сәләхте тыйып торорлоҡ көс табылырмы? Беҙҙекеләрҙең бығаса булған хаталары кәмерме? Александр Головин, Криштиану Роналдо кеүек, яуаплылыҡты үҙ өҫтөнә йөкмәй алырмы? Бөгөн кис ошо һорауҙарға яуап табырбыҙ.
Әлегә сенсация булырлыҡ яңылыҡ­тарҙан – Португалия лидерының яңғы­ҙының тиерлек испандарға бирешмәүе (3:3), немецтарҙың мексикандарҙан еңелеүе (0:1), бразилдарҙың швейцарҙар менән тигеҙ иҫәпкә уйнауы (1:1).