Шәп иттең, Ольга! Межгорье ҡыҙы Ольга Вилухинаның Антхольце ҡалаһында (Италия) биатлон буйынса Донъя кубогында бронза миҙал яулауын ишеткәс, шатлығымдан ҡысҡырып ебәргәнемде һиҙмәй ҙә ҡалдым.
Ҡыуанмаҫлыҡ та түгел шул. Мәктәптә уҡыған йылдарынан таныш миңә был ныҡыш, сәмсел ҡыҙыҡай. “Йәншишмә” гәзите призына үткәрелгән республика саңғы ярыштарында һәр саҡ тәүге урындарҙы яулай ине. Уны башҡа ҡала һәм райондыҡылар ҙа танып-белеп бөткәйне.
Был – яҡташыбыҙҙың быйылғы ҡышҡы миҙгелдә өсөнсө юғары наградаһы. Бығаса ҡатнаш һәм ҡатын-ҡыҙҙар араһындағы эстафеталағы уңыштары өсөн ике алтын миҙал яулағайны.
Ольга биатлон менән 2004 йылдан шөғөлләнә башлай. Ныҡыш, үҙ-үҙенә талапсан ҡыҙға тәүге уңыш 2006 йылда Америкала үҫмерҙәр араһындағы донъя чемпионатында килә.

Илфат Солтан улы Рәжәпов 1975 йылдың 23 ноябрендә Ғафури районының Имәндәш ауылында тыуған. Рәсәйҙең атҡаҙанған спорт мастеры, дүрт тапҡыр Рәсәй чемпионы, Сиднейҙағы Олимпия уйындарында ҡатнашҡан. 1997 йылда – донъя, 1998 йылда Европа чемпионаттары призеры.
Былтыр Башҡортостандың Бокс федерацияһына яңы рәйес тәғәйенләнде. Хәҙер был вазифала – Илфат Рәжәпов. Республикала бокстың артабанғы яҙмышы тураһында белешер алдынан, һүҙҙе яңы етәксе менән танышыуҙан башланыҡ.
– Илфат Солтан улы, быға тиклем Силәбелә йәшәһәгеҙ ҙә, Өфөгә килергә ризалашҡанһығыҙ. Күнегелгән мөхиттән айырылып китеүе еңел булмағандыр бит?
– 1984 йылда Ғафури районының Имәндәш ауылынан Силәбе ҡалаһына күстек. Ул саҡта III класта уҡый инем.

Шашка — аҡыллылар һәм бөйөктәр уйыны, тип әйткән бер аҡыл эйәһе. Зиһенде үҫтереүсе был спорт төрөн йәнләндереү ниәтенән Сибайға РФ Дәүләт Думаһы депутаты Сәлиә Мырҙабаева, билдәле донъя чемпиондары Тамара Танһыҡҡужина менән Айнур Шәйбәков килде.
—Сибайҙы һайлап яңылышманыҡ. Бында уҡыусылар, студенттар ҡатнашлығында шашка түңәрәктәре уңышлы эшләй. Беҙҙең проекттың төп маҡсаты — балалар баҡсаһы, мәктәп һәм юғары уҡыу йорттары араһында эҙмә-эҙлекле эш алып барыу. Ошо осраҡта ғына ниндәйҙер һөҙөмтәләргә өлгәшергә мөмкин. Бында боронғо уйынды ҡайтанан тергеҙеү өсөн шарттар етерлек, иң мөһиме — шашка буйынса яҡшы тренер бар, уйнарға һәм өйрәнергә теләүселәр ҙә бихисап. Ҡала хакимиәте лә беҙҙең тәҡдимде хуплап ҡаршы алды, ярҙам итәсәген белдерҙе, — тине Тамара Танһыҡҡужина.

“Салауат Юлаев” хоккей командаһы плей-офф уйындарына ышаныслы аҙымдар менән атлай. Ул әле чемпионатта алтынсы урында килә. Юғарыраҡ та урынлашҡан булыр ине, әммә Көнсығыш конференцияһы лидеры “Трактор”ҙан 2:1, турнирҙың иң аҙағында килгән “Автомобилист”ан 6:2 (!) иҫәбе менән отолоп, бер нисә мәрәй юғалтты. Әммә, нигеҙҙә, еңелеүҙәрҙән генә торған “ҡара октябр”ҙән һуң, бындай күрһәткес тә ҡәнәғәтләнерлек. Мәҫәлән, миҙгел башында иң көслө клубтарҙы “тубыҡландырып”, бөтәһен дә ғәжәпләндергән “Амур” хәҙер ни бары 14-се урында, плей-офҡа ҡарай кәрен бөтөнләй юғалтты.
Әлбиттә, хоккей белгестәре фекеренсә, әле Гагарин кубогына төп дәғүәселәр булып Санкт-Петербургтың “СКА”-һы менән Силәбенең “Трактор”ы иҫәпләнә.

Республикабыҙҙа сәләмәт тормош өлгөһө көндән-көн киң үҫеш ала. Спорт ҡоролмаларының күплеге буйынса Башҡортостан илдә беренсе урында тора, физик культура менән шөғөлләнеүселәрҙең һаны ла йылдан-йыл арта.
Маҡсатлы сәйәсәт һөҙөмтә бирә
Әле баш ҡалала мең ярым самаһы спорт ҡоролмаһы бар. Улар араһында 671 спорт залы, 31 бассейн, биш стадион, өс спорт һарайы иҫәпләнә. Яңы объекттар төҙөү ҙә дәррәү бара. Башҡортостан Президенты Рөстәм Хәмитовтың Мөрәжәғәтнамәһендә халыҡты, бигерәк тә йәш быуынды спортҡа ылыҡтырыу төп фекер булып үтә: “Быйыл республикабыҙҙың ҡалаларында һәм район үҙәктәрендә бассейнлы 13 физкультура-һауыҡтырыу комплексы төҙөйәсәкбеҙ”.