“Бай атай, ярлы атай” ниндәй була?

Тота килеп кенә теләһә ниндәй китапты башҡортсаға ауҙарыу дөрөҫ тә булмаҫ ине, шуның өсөн башта Башҡорт­остан студенттары ассоциация­һы BashStudents баш ҡалалағы йәштәр араһында тауыш биреү ойошторҙо.

“Бәйләнештә” социаль сел­тәрендә (54 тауыш), Инстаграмда (23) барған тауыш биреү һөҙөмтәләре буйынса Роберт Кийосакиҙың “Бай атай, ярлы атай” китабы һайлап алынды. Шәп идея, шулай бит!

Ҡайһы берәүҙәрҙең “Ә ни өсөн нәфис әҙәбиәт түгел?” тип һорауы ла ихтимал. Бының менән махсус белгестәр ҙә шөғөлләнә ала, ә йәштәр үҙҙә­ренә оҡшаған, күңелдәренә ятҡан китапҡа туҡтаған. Был – уларҙың күмәк тауыш биреү юлы менән һайлаған китабы!

Әйткәндәй, китапта шундай юлдар бар: “Еңеүселәр өсөн еңелеү илһам сығанағына әйләнә. Ә уңышһыҙҙар өсөн еңелеү өмөттәр селпәрәмә килеүгә тиңләшә”.

Йәнә лә берәү: “Тормош бөтә­һенең дә кәрәген бирә. Әммә берәүҙәр бирешә, ә икенселәр ҡаршы тора. Бары тик һирәктәр һабаҡ ала һәм артабан атлай. Ундай кешеләр тормош туҡмаҡ­тарына ҡыуана. Улар өсөн һәр туҡмалыу ниндәйҙер яңылыҡ белергә тейешлектәре хаҡында аңлата. Улар һабаҡ ала һәм артабан хәрәкәт итә. Күпселек тота ла бирешә, ә ҡайһы берәүҙәр – бына һинең кеүектәр – көрәшә!”

Тәржемә менән ассоциация әүҙемселәре Хасбулат Абдуллин, Ынйы Әбсәләмова, Зилиә Агишева, Әлиә Әлимғужина, Сәлимә Әхмәрова, Наҙгөл Әх­мәтшина, Минзилә Даниярова, Вәрис Исҡужин, Ильяс Исхаҡов, Эльвира Йәрмөхәмәтова шөғөл­ләнәсәк.

Тәржемә ителгән китаптың электрон варианты интернетҡа ҡуйыласаҡ, уны һәр кем уҡый аласаҡ. Был хаҡта йәштәр социаль селтәрҙәрҙә хәбәр итәсәк. Тәржемә эше еренә еткерелеп башҡарылғас, иң әүҙем эшлә­гәндәргә Башҡортостан Яҙыу­сылар союзының Маҡтау ҡағыҙ­ҙары, китаптар тапшырыласаҡ. Өлөшләтә китапты башҡорт матбуғатында баҫыу ҙа күҙ уңын­да тотола. Бик етди эшкә то­тонған йәштәр! Сифатлы итеп тәржемә итергә яҙһын донъяның бик күп илдәрендә популярлыҡ менән файҙаланған был йы­йынтыҡты!