Радик ағай бит ул!

Башҡортостандың атҡаҙанған матбуғат һәм киң мәғлүмәт хеҙмәткәре, Сергей Чекмарев исемендәге премия лауреаты, Рәсәй Ауыл хужалығы министрлығының Почет грамотаһы менән бүләкләнгән Радик Байназаров белдереүенсә, сәйәсәт һәм ауыл хужалығы темалары күңеленә ифрат яҡын булғанға күрә, ошо йүнәлештәрҙә мәҡәләләрҙе рәхәтләнеп яҙған.

Радик Үзбәк улы “Башҡорт­остан” гәзите редакцияһына 1989 йылда эшкә урын­лашҡан, йәмғеһе 23 йыл хеҙмәт күрһәткән. Гәзиттең тиражы 106 мең данаға еткән 1989 – 1990 йылдарҙы иң күңелле осор тип иҫәпләй, ул саҡта гәзит аҙна­һына алты тапҡыр нәшер ителгән. Уны редакцияға “Ижтимағи-сәйәси тормош” бүлегенә хәбәрсе итеп алалар, аҙаҡтан инде “Ауыл хужалығы” бүлегенә күсерәләр.

– Башҡортостанды арҡыры­ға-буйға йөрөп сыҡтым, һәр районда һәм ҡалала булдым, мин аяҡ баҫмаған төбәк һирәктер, – тип һөйләй ҡәләмдәшем. – Элек бит командиров­калар бер нисә көн һуҙымында барҙы, уның ҡарауы, материалдарҙы шунда уҡ тапшыра торғайныҡ. Ябай кешеләр, тракторсы, комбайнсы, водитель кеүек баҫыу уңғандары, ал-ял белмәгән игенселәр, таш яуып торған­да ла яландан ҡайтмаған малсылар тура­һында йыш яҙҙыҡ. Ә ул шулай булырға тейеш тә.

“Башҡортостан” гәзитендә ҡай­һы район һәм ҡаланың нисек эш­ләүен яҡтыртҡан “Абруй-рейтинг” махсус бите даими сыға торғайны. Шул иғтибарға лайыҡ, “Кем нисек эшләй?” рубрикаһында аналити­каға бәйле мәҡәләләр биреү гәзитте уҡымлы итте, тиражды арт­тырыуға ла көслө йоғонто яһаны.

– Башҡортостандың ҡала һәм район хакимиәттәре башлыҡтары өсөн республика семинарҙары ойошторолдо, – тип һөйләй әңгә­мәсем. – Ошо сара көслө умарта күселәй гөжләп торҙо. Кисәгеләй хәтеремдә, ҡайһы бер район йәки ҡала хакимиәттәре башлыҡтары үҙҙәрен артыҡ тәнҡит утына тот­мауҙы үтенде. “Беҙгә ҡаты бәрел­мәгеҙ инде, киләсәктә барыһын да төҙә­тербеҙ”, – тип арттан ҡалмай һорап йөрөй торғайнылар. Бөтә материалдар ҙа нигеҙле булғас, берәүгә лә ярлыҡау булманы, барыһын да ғәҙел һәм дөрөҫ итеп яҙҙым.

-  Наилә НУРҒӘЛИНА