Сыуашстанда - сағыу сара

Дәүләт башлығы Владимир Путин тарафынан иғлан ителгән Рәсәй халыҡтарының мәҙәни мираҫы йылында Сыуашстан Республикаһы I Бөтә Рәсәй балалар фольклориадаһын һәм Рәсәй балалар фольклор ассамблеяһын уҙғарыу майҙансығына әүерелде.

24 июндә Чебоксарҙың Ҡыҙыл майҙанында фольклориаданы асыу тантанаһы булды. Илдең 78 төбәгенән 1100 кеше – балалар фольклор, хореография, халыҡ йыр коллективтары һәм оркестрҙар ҡатнашыусылары милли йолаларҙың төрлөлөгөн күрһәтергә килгән. Фольклориада Сыуашстан Республикаһы көнөнә арналған сараларҙың сағыу дауамы буласаҡ.

Рәсәй Президентының Волга буйы федераль округындағы Тулы хоҡуҡлы вәкиле Игорь Комаров сарала ҡатнашыусыларға видеомөрәжәғәт ебәрҙе, унда ошондай һүҙҙәр ҙә бар: “Рәсәй Хөкүмәте менән раҫланған исемле йылдың төп проекттары планына утыҙ алты сара инде. Өсәүһе июндә Сыуашстанда үтә. Был “Рәсәй йырҙары”, “Рәсәйҙең сигелгән картаһы” фестиваль-марафоны һәм Беренсе Бөтә Рәсәй балалар фольклориадаһы – быйылғы йылдың иң сағыу ваҡиғаларының береһе. Волга буйының, Сыуашстандың уны үткәреү майҙансығы итеп һайланыуы ҡыуаныслы”.

Беренсе Бөтә Рәсәй балалар фольклориадаһы программаһында – урам буйлап йөрөү, делегацияларҙың презентация сығыштары, биҙәү-ҡулланма ижады оҫталарының изделиелары күргәҙмә-йәрминкәһе, флешмобтар, "түңәрәк өҫтәл"дәр, дуҫлыҡ кисәләре. Ошо уҡ көндәрҙә Сыуашстанда Рәсәй балалар фольклор ассамблеяһы – балалар һәм йәштәр коллективтары конкурсы уҙғарыла. Унда халыҡ йолаларын, фольклорҙы популярлаштырыуҙың заманса формаларын берләштереүсе программалар күрһәтелә.

Рәсәй халыҡтарының беренсе балалар фольклориадаһын Волга буйы федераль округында үткәреү осраҡлы түгел – округ биләмәһендә үҙенсәлекле мәҙәниәткә һәм йолаларға эйә 160-тан ашыу милләт йәшәй.

Шуны ла билдәләп үтергә кәрәк, ике йылдан Волга буйы федераль округы йәнә төрлө халыҡтарҙың милли мәҙәниәттәрен йәлеп итеү үҙәгенә әйләнәсәк: 2024 йылда Башҡортостан (Өфө ҡалаһы) Беренсе Бөтә донъя балалар фольклориадаһын ҡабул итәсәк. Бындай ҡарар Будапештта Фольклор фестивалдәре һәм халыҡ сәнғәте ойошмалары халыҡ-ара советының (CIOFF) 50-се Генераль ассамблеяһында ҡабул ителде.

Фото: Мәҙәниәт министрлығы.