Кино төшөрөүгә - 50 миллион һум

Башҡортостан Республикаһының гранттар фонды, Радий Хәбировтың ҡарары буйынса кинематография өлкәһендәге проекттарҙы ҡеүәтләү маҡсатында махсус конкурсҡа 50 миллион һум бүлде. Был аҡсаны кем ала һәм нисек алырға була?

Конкурсҡа ғаризаны, коммерция нигеҙендә дәүләт ойошмаһы булмаған, йәғни, ойошманың составында дәүләт органдарының учредителдәре булмаған, иҡтисади эшмәкәрлеге ОКВЭД буйынса кинематографияға бәйләнгән һәм бер йыл элек теркәлгән ойошмалар яҙа ала.

Конкурста ҡатнашыу өсөн ғаризалар 2023 йылдың 1 авгусынан алып 1 сентябргә тиклем ҡабул ителә. Ҡағиҙәгә ярашлы документтарҙан башҡа,  ғаризаға фильмдың презентацияһын һәм сценарийын да индерергә кәрәк була.

Грантглавы102.рф сайтында ғаризаны бирергә һәм конкурстың Положениеһы менән ныҡлап танышырға мөмкин.

Конкурстың положениеһын әҙерләү буйынса “Башҡортостан” киностудияһы, мәҙәниәт министрлығы һәм бәйге комиссияһы ҙур эш башҡарҙы.

“Конкурс бик үҙенсәлекле, документтарҙы иғтибар менән өйрәнергә саҡырам. Яҡын арала, даими ҡатнашыусылар менән фонд бер-нисә осрашыу ойошторасаҡ, унда бар шарттар ҙа ентекле аңлатыласаҡ”, – тип белдерҙе Башҡортостан Республикаһы гранттар фондының генераль директоры Роман Низаметдинов.

Еңеүселәр өсөн гранттың  иң ҙур күләме 15 миллион һум тәшкил итәсәк.

Ғаризалар түбәндәге 10 йүнәлеш буйынса ҡабул ителә:

1. Тарихи һәм мәҙәни хәтер (күренекле шәхестәргә, Башҡортостан һәм Рәсәйҙең тарихындағы мөһим мәҙәни һәм тарихи ваҡиғаларға, төп дәүләт байрамдары һәм иҫтәлекле даталарға бағышланған проекттар).

2. Балаларға – иң мөһим мәл тураһында (тәрбиәүи характерҙағы художестволы фильмдар).

3. Дуҫлыҡ республикаһы (милләт-ара һәм конфессия-ара мөнәсәбәттәрҙә мәҙәниәтте һаҡлауға ярҙам итеү тураһындағы проекттар).

4. Заманса мәҙәниәт коды (республиканың һәм уның халҡының заманса йәшәйешенә һәм уларҙың проблемаларына, уңыштарына арналған проекттар).

5. “Башҡортостан – 2030” – республика киләсәктә (республиканың киләсәгенә һәм уның потенциаль үҫеш юлына арналған проекттар).

6. Әҙәби мираҫ (башҡорт әҙәбиәтен һәм драматургияһын экранға сығарыу, шулай уҡ республикалағы халыҡтарҙың әҙәбиәтен һәм драматургияһын яҡтыртыу) .

7. Гражданлылыҡ (социаль проекттарҙы тормошҡа ашырғанда коммерция нигеҙендә булмаған ойошмаларҙың эшмәкәрлеген асыу, социаль үҙгәрештәр барышындағы лидерҙарҙың яҙмыштары тураһындағы проекттар).

8. Геройҙар заманы (ҡатмарлы экстремаль хәлдәр ваҡытында үҙҙәрен лайыҡлы һәм ыңғай күрһәткән кешеләр һәм илһөйәрлекте популярлаштыуға йүнәлтелгән проекттар).

9. “Атайсал” изге эштәр (үҙҙәренең кесе Ватандарының үҫешенә ҙур өлөш индергән кешеләр, һәм республиканан ситтә йәшәп үҙҙәренең Тыуған ерен бар яҡлап та яҡлаған һәм ярҙам күрһәткән кешеләр тураһында проекттар).

10. Һинең тауышың (электораль мәҙәниәтте күтәреү йүнәлешендәге проекттар).

“Башҡортостан киноиндустрияһын үҫтереү өсөн авторҙарҙың һәм жанрҙарҙың төрлөлөгө зарур. Беҙҙең өсөн йәш һәм һәләтле кинематографистарҙы асыу һәм ҡеүәтләү мөһим. Бигерәк тә, үҙҙәренең проекттарын тормошҡа ашырыу өсөн финанси мөмкинселектәре булмаған йәш режиссерҙарға ярҙам итергә кәрәк. Шуға ла, конкурсҡа һығымта яһағанда Башҡортостан кинематографияһында яңы исемдәр асылыр, тип өмөт итәм”, –  тине А. Абдразаҡов исемендәге “Башҡортостан” киностудияһының директоры Юнир Әминев.

Конкурсҡа һөҙөмтәне декабрҙә сығарасаҡтар. Еңеүселәрҙең фильмдары 2024 йылдың 1 ғинуарынан төшөрөлә башлаясаҡ. Ҡыҫҡа метражлы фильмдар 2024 йылдың 31 авгусына төшөрөлөп бөтөргә тейеш, ә тулы метражлы фильмдар 2026 йылдың 31 декабренә тиклем.

Милли кино сәнғәтенә битараф булмағандар, ашығығыҙ! Бәлки тап һеҙҙең кинопроектығыҙ еңең сығыр һәм тап һеҙҙең фильмығыҙҙы ҡарау бәхете тейер республика халҡына!

Фото: интернет селтәренән.