Сергей Ролдугин – Башҡортостандың халыҡ артисы

30 октябрҙә Өфөлә Башҡортостан Башлығы Радий Хәбиров республиканың дәүләт академия симфоник оркестры концертында булды. Унда билдәле виолончелист, педагог, Рәсәйҙең халыҡ артисы Сергей Ролдугин ҡатнашты.

Радий Хәбиров Сергей Ролдугиндың Башҡортостан мәҙәниәтен үҫтереүгә индергән өлөшөн билдәләне:
– Республиканың күп кенә йәш таланттарына һеҙҙең менән эшләү мөмкинлеге тейҙе. Беҙҙең музыка учреждениеларында үткән оҫталыҡ дәрестәрегеҙ ҙур әһәмиәткә эйә. Һеҙ ысын патриот һәм халыҡ музыканты, – тине Радий Хәбиров.

Радий Хәбиров музыкантҡа Башҡортостандың халыҡ артисы исемен бирҙе. Сергей Ролдугин, үҙ сиратында, республика етәкселегенә музыка сәнғәтен үҫтереүгә иғтибар бүлгәне өсөн рәхмәт әйтте һәм Рәсәй сәхнәләрендә һәләтле Башҡортостан башҡарыусыларының уңыштары перспективаларын билдәләне.

– Һеҙҙең республика үҙенең таланттары менән Рәсәйгә тағы ла күп шатлыҡ килтерер, тип ышанам, – тине билдәле виолончелист.
Фото: glavarb.ru