Вуз менән предприятиены күптәнге хеҙмәттәшлек ептәре бәйләй

«Полигон» ғилми-етештереү предприятиеһы Өфө фән һәм технологиялар университеты менән берлектә инновациялы радиоэлектроника һәм оптоинформатика лабораторияһын булдырҙы.

Яңы майҙансыҡ заманса юғары технологик селтәр ҡорамалдары менән йыһазландырылған. Бында оптик элемтә ҡоролмалары һәм оптик мәғлүмәтте эшкәртеү, видеокүҙәтеү системаларын булдырыу һәм камиллаштырыу өлкәһендә тикшеренеүҙәр, шулай уҡ антенна ҡоролмаларын һәм сымһыҙ элемтә СВЧ-тракты, һүрәттәрҙе эшкәртеүҙең интеллектуаль алгоритмдарын эшләү һәм оптималләштереү менән шөғөлләнәсәктәр.

- Лаборатория телекоммуникация системалары кафедраһы хеҙмәткәрҙәренең ғилми-тикшеренеү эшен дөйөмләштереүгә һәм уны мәғлүмәт-коммуникация технологиялары кеүек технологик суверенитет өсөн мөһим йүнәлештә әҙер продукттарҙы баҙарға сығарыу буйынса индустриаль партнер тәжрибәһе менән берләштереүгә йүнәлтелгән, - тип хәбәр итте лаборатория етәксеһе, ӨФТУ-ның телекоммуникация системалары кафедраһы доценты Григорий Воронков.

Лаборатория белгестәре – тикшеренеүселәр һәм индустриаль партнерҙар заказы буйынса проекттар башҡарыу тәжрибәһенә эйә булған университет аспиранттары.

«Полигон» ғилми-етештереү предприятиеһының вуз менән хеҙмәттәшлеге күп йылдар дауамында алып барыла. Кафедраны тамамлаусыларҙың күбеһе артабан ошо предприятие хеҙмәткәрҙәре булып китә.

Белешмә өсөн:

Евразия ғилми-белем биреү үҙәгенең вуз-ара студенттар кампусын төҙөү РФ Президенты ҡушыуы һәм Рәсәй фән һәм юғары белем биреү министрлығының «Фән һәм университеттар» милли проектын тормошҡа ашырыу сиктәрендә алып барыла. Беренсе сират 2023 йылдың декабрендә сафҡа индерелде. Бында Өфөләге төп университеттарҙың фәнни эшмәкәрлеге һәм дисциплина-ара хеҙмәттәшлеге өсөн лабораториялар һәм киңлектәр асылды. 2025 йылдың аҙағына тиклем кампустың икенсе өлөшөн тапшырыу күҙаллана. Күләмле проект сиктәрендә дөйөм ятаҡтар, коворкингтар, китапханалар, магазиндар, дөйөм туҡланыу нөктәләре, спорт майҙансыҡтары һәм ял итеү урындары барлыҡҡа киләсәк.

Сығанаҡ: pravitelstvorb.ru