Хәлдәрегеҙ нисек, һуғыш ветераны?

Бөйөк Ватан һуғышы ветераны, “Еңеү өсөн” миҙалы һәм башҡа бихисап орден-миҙалдар менән бүләкләнгән Фәрит Хәсәнов Бөйөк Еңеүҙең 77 йыллығын яҡшы кәйеф менән ҡаршы алырға әҙерләнә.

– Беҙҙә, совет һалдаттарында, илһөйәрлек тойғоһо ныҡ көслө булды, – тип һөйләй 96 йәшлек һуғыш ветераны Фәрит Вәли улы. – Ҡурҡыуҙы белмәнек, һәр ваҡыт алға ашыҡтыҡ, алғы һыҙыҡҡа барырға һәр беребеҙ атлыҡты. Еңеүҙең беҙҙең буласағын йөрәгебеҙ менән тойҙоҡ.

Фәрит Хәсәнов армияға 1943 йылдың 2 октябрендә алына, Украина ерен фашистарҙан таҙартыуҙа ҡатнаша, ә Еңеү һүҙен Днепропетровск өлкәһенең Кривой Рог ҡалаһында ишетә.

Фәрит Вәли улы 1966 йылда тыуған яҡтарына ҡайта. Әйткәндәй, яҡташыбыҙ Стәрлебаш районының Ҡарағош ауылында тыуып үҫкән, ә Бүздәк районының Бүздәк ауылында төпләнгән. Фәрит Хәсәновты Башҡортостандан тыш ситтә лә бик яҡшы беләләр. Ул заманында Үзбәкстанда йәшәгән, Үзбәкстандың Ҡарағалпаҡ АССР-ы социалистик милекте урлаусыларға ҡаршы көрәш бүлеге начальнигы кеүек юғары вазифаны биләгән.

Фәрит Вәли улы ҡатыны Галина Семеновна менән ғүмер йомғағын һүтәләр.

Фото: Вера Фәритова.