Балалар баҡсаһында мәктәпкәсә йәштәге бала шәхес булып формалаша, уның һаулығына нигеҙ һалына, шуға ла бәләкәстең яҙмышы тәрбиәсенең аҡылына, сыҙамлылығына, күңел донъяһына, иғтибарына бәйле, сөнки ул әсәләрҙәй йөрәк йылыһы менән наҙлап һөйә, шәхес тәрбиәләй.
“Кеше һөнәрҙе түгел, ә һөнәр кешене һайлай”, тип яҙған Сократ. Минең осраҡта ла шулай булды. Филология факультетын тамамлап, бер аҙ мәктәптә балалар уҡытҡас, яҙмыш балалар иленә илтте. Был һөнәрҙең ни ҡәҙәр ҡыҙыҡлы, яуаплы хеҙмәт икәнен асырға тырыштым һәм астым, сөнки бер әкиәти донъяға оҡшаған бала саҡ, кескәйҙәр иленә эләктем. Яҡты, йылы, йыһазландырылған төркөмдә, иртәнән кискә тиклем шау-гөр килеп торған бәләкәстәрҙең йөҙҙәрсә һорауына яуап табыу, аңлатыу, төрлө күнекмәләр, ҡыҙыҡлы уйындар, дәрестәр, әкиәт, йыр-моң иленә сумыуҙар күҙ асып йомған арала үтеп тә китә. Унан тыш, ата-әсәләр менән әңгәмәләшеү, кәңәш биреү үҙе бер ҡыҙыҡлы эш булып тора. Был ваҡытта төрлө проблемаларҙы, тауҙай өйөлгән эштәрҙе бергә атҡарып сыҡҡан коллегам, кәңәшсем, пар ҡанатым бар – Рәсимә Рәмил ҡыҙы Солтанморатоваға рәхмәттәр яуһын!
Тәрбиәсе һөнәре ысын мәғәнәһендә балаларға һөйөү, ихтирам талап итә. Ошондай сифаттарға эйә булған хеҙмәткәрҙәр эшләй беҙҙең кескәйҙәр донъяһында. Был “әкиәт иле” Стәрлетамаҡ ҡалаһының 55-се балалар баҡсаһында урынлашҡан. Бында үҙ һөнәрен яратҡандар хеҙмәт итә, сөнки үҙ өҫтөңдә даими эшләүҙе, конкурстарҙа, курстарҙа, семинарҙарҙа, төрлө оҫталыҡ дәрестәрендә ҡатнашыуҙы, хәҙерге технологияларҙы өйрәнеүҙе, ғөмүмән, заман менән бергә атлауҙы талап итә торған хеҙмәт икәнен аңлай улар.
Бәләкәстәрҙең үҙ тәрбиәсеһе булған кеүек, беҙҙең дә өйрәтеүсебеҙ бар. Һәр ваҡыт ярҙам ҡулы һуҙырға әҙер торған, бар һорауҙарға яуап биргән кешебеҙ, баҡсабыҙ мөдире – Лилиә Нәркис ҡыҙы Күзбәкова. Уға барыһы өсөн дә рәхмәт. Ә инде тәрбиәүи, белем биреү яғынан һәр ваҡыт үҙ оҫталығы менән уртаҡлашҡан, төрлө үрҙәргә әйҙәгән өлкән тәрбиәсебеҙ – Роза Зәфнүн ҡыҙы Батыргәрәева. Уларҙың ҡанаты аҫтында нығынабыҙ, үҫәбеҙ.
Ғөмүмән, тәрбиәсе – һәр яҡтан да камил шәхес ул. Бер үк ваҡытта педагог, табип, артист, рәссам һәм, иң мөһиме, балаларҙы яратҡан, хөрмәт иткән кеше.
- Гөлнара МӨХӘМӘТШИНА
Стәрлетамаҡ ҡалаһы