Күмертауҙа йәш шайморатовсылар көс һынашты

Күмертау ҡалаһында Ватанды һаҡлау көнөнә арналған Рәсәй Геройы генерал-майор М.М. Шайморатов исемендәге Кубок өсөн “Ҡышҡы Шайморатов уйындары"ның йомғаҡлау этабы үтте.

Һайлап алыу этабы 11 февралдә “СМАРT” 2-се республика полилингваль күп профилле гимназияһы базаһында уҙҙы, унда "Шайморатов кластары" командирҙары Башҡортостан Республикаһы тарихы һәм мәҙәниәте буйынса интеллектуаль олимпиадала һәм мылтыҡтан атыуҙа ҡатнашты.

18 февралдә Күмертауҙа 10-сы урта мәктәп базаһында йомғаҡлау этабы үтте. Әйтергә кәрәк, тап ошо мәктәптең "Шайморатов кластары" уҡыусылары былтыр "Йәйге Шайморатов уйындары" еңеүсеһе булды.

Икенсе этапта стройҙа йөрөү һәм йырҙар, шулай уҡ төрлө уйындарҙа иң етеҙ һәм шәп ҡатнашыусыны асыҡлау өсөн спорт ярыштары ойошторолдо: уҡтан атыу, автоматты һүтеп-йыйыу, турникта ҡалҡыныу, йүгереү, оҙонлоҡҡа һикереү, тупты баскетбол ҡулсаһына ырғытыу.

Ейәнсура, Яңауыл, Саҡмағош райондары, Ағиҙел ҡалаһы һәм “СМАРТ” 2-се республика полилингваль күп профилле гимназияһы командалары яҡшы һөҙөмтәләр күрһәтеп, призлы урындарға сыҡты.

3-се Башҡорт республика интернат-мәктәбе һәм Күмертауҙың 10-сы урта мәктәбенең Шайморатов командалары беренсе урын яуланы.

Абсолют еңеүсе тип Рәми Ғарипов исемендәге 1-се Башҡорт республика интернат-мәктәбе коллективы танылды, ул Рәсәй Геройы генерал-майор Миңлеғәле Шайморатов исемендәге күсмә кубокты алды.

Фото: рәсми сығанаҡтарҙан.