Күҙ йәштәре аша рәхмәт әйтәләр

“Йәшәү ризығы” – бөтә Рәсәйҙә таралған ҙур проект. Уның эшмәкәрлеге илебеҙҙең 50-гә яҡын ҡалаһында йәйелдерелгән. Ирекмәндәрҙән торған төркөм 30 йылға яҡын мохтаж кешеләргә социаль ярҙам күрһәтә. Бөгөн һеҙҙе “Йәшәү ризығы Сибай” хәйриә ойошмаһының эшмәкәрлеге менән яҡындан таныштырып үтергә теләйбеҙ.

Сибайҙа был ойошма дүртенсе йыл эшләп килә. Ошо ваҡыт эсендә ирекмәндәр 25 меңдән ашыу кешене төрлө ризыҡ йыйылмалары – емеш-еләк, йәшелсә, һуттар, йылы аш менән тәьмин иткән. Йөрәктәре изгелеккә, мәрхәмәткә асыҡ кешеләр берләшеп, мохтаждарға күстәнәстәр илтеп ҡыуандыра, ҡарттар һәм балалар йорттары тәрбиәләнеүселәре янына ашыға, коронавирус шарттарында ковид-госпиталдәрҙә эшләгән табиптарға һәм хеҙмәткәрҙәргә рәхмәт хистәрен белдерә.

“Йәшәү ризығы Сибай” хәйриә ойошмаһы Сибай ҡала дауаханаһының паллиатив (оло йәштәгеләр), наркология бүлексәләрендә, балалар приютында, Баймаҡ районының Түбә һәм Аҡморон ауылдарындағы ҡарттар йортонда йыш була.

Был изге эшкә теләге булған һәр кем ҡушыла ала. Кемдәрҙер емеш-еләк, башҡа төрлө аҙыҡ-түлек һатып алып бирә, икенселәр аҡса күсерә, өсөнсөләр ирекмән булараҡ ярҙам тәҡдим итә.

- Ойошмабыҙ 15-20 ирекмәнде берләштерә. Комплекслы төшкө аштар, файҙалы күстәнәс йыйылмалары таратабыҙ. Мәҫәлән, Ғәле ауылы янындағы урман янғындары мәлендә йылы аш таратыуҙы ойошторҙоҡ. Кешеләргә ярҙам итеүҙән күңел иҫ киткес ҙур ҡыуаныс кисерә. Уларҙың ихлас рәхмәт һүҙҙәрен ишетеү, күҙ йәштәре аша йылмайыуын күреү башҡарған эшебеҙҙең юҡҡа түгеллеген раҫлай. Ҡайҙа ғына булмаһын – приюттамы, ҡарттар йортондамы, дауаханаламы – кеше үҙен кемгәлер кәрәкле итеп тойһон, уның тураһында хәстәрлек күреүселәр барлығын белһен, яҡтылыҡҡа, яҡшылыҡҡа ышанһын. Бына ошо изге маҡсат беҙҙе берләштерә, дәрт һәм көс өҫтәй, - тине “Йәшәү ризығы Сибай” ойошмаһы етәксеһе Илшат Ильясов.

Ойошма үҙ эшмәкәрлеген социаль селтәрҙәге төркөмөндә тулыһынса яҡтыртып, отчет биреп бара. Ҡыҙыҡһыныусылар өсөн һылтанма: https://vk.com/sibayffl Әгәр аҡсалата ярҙам күрһәтергә теләһәгеҙ, Зөлфиә Шәһит ҡыҙы исемендәге картаға - 5469060020461916 - күсерә алаһығыҙ. Белешмәләр өсөн Илшат Ильясовтың телефоны: 89374832368.

Ойошманың эшмәкәрлеге менән яҡынданыраҡ видеояҙма аша ла таныша алаһығыҙ.

Видеояҙма һәм фотолар: vk.com/sibayffl төркөмөнән.