Бөтә яңылыҡтар
Ғорурланабыҙ
13 Ғинуар 2023, 14:39

Шайморатов ордены айырыуса яҡын

Үҫмер сағында уҡытыусы булырға хыялланған.

ufacity.info.
Фото:ufacity.info.

Кашшаф Сәмиғуллин – Бөйөк Ватан һуғышы ветераны. Ул Йәрмәкәй районының Түбәнге Ҡарамалы ауылында ярлы крәҫтиән ғаиләһендә донъяға килгән. Тулы булмаған урта мәктәпте тамамлағас, ауыр йәшәүҙәре сәбәпле уҡый алмаған. Етмәһә, бәләкәй сағында уҡ ата-әсәһен юғалтҡан.

Үҫмерҙең уҡырға теләге көслө була – уҡытыусы булырға хыяллана. 17 йәше тулғас, гражданлыҡ хәле акттарын теркәү буйынса Йәрмәкәй район бюроһы мөдире булараҡ хеҙмәт юлын башлай. Һуңыраҡ ФЗО-ла белем ала. Унан Иҫке Турай урта мәктәбендә өлкән пионервожатый булып эшләй.

1941 йылдың 22 июнендә Бөйөк Ватан һуғышы башлана, әммә йәше тулмағас, армияға алмайҙар. Егет, метрикаһына бер йәш өҫтәп яҙҙыртып, Ватанды һаҡларға китә.

1942 йылдың 15 майында Калинин фронтында Ржев эргәһенә пулемет расчеты командиры итеп ебәрәләр. Унда ул 20-се армия сафында һуғыша. Августа Кашшаф Сәмиғуллиндың отряды беренсе­ләрҙән булып һыу аша сыға һәм десант полкының башҡа бүлексәләренә кисеүҙе үтеүгә ярҙамлаша. Был ҡаты бәрелештә яралана һәм контузия ала.

Кашшаф Сәмиғуллин оҙаҡ ҡына госпиталдә дауалана, уға икенсе төркөм инвалидлыҡ бирәләр. Шуға ҡарамаҫтан, тағы ла яуға ебәреү­ҙәрен һорай. Һөҙөмтәлә уға Эске эштәр халыҡ комиссариатына йү­нәлт­мә бирәләр. Фронтовик унда бандитизмға ҡаршы көрәш бүле­гендә эшләй, етди енәйәттәрҙе тик­шереүҙә ҡатнаша – сит ил развед­каһының агенттарын эҙәрлекләй, егерменән ашыу ҡурҡыныс енә­йәт­сене табыуға өлгәшә, шул иҫәп­тән Ватанға хыянат иткәндәрҙе.

Дәүләт именлек хеҙмәтендә оҙаҡ йылдар эшләп, полковник дә­рәжәһенә тиклем үрләп, 1985 йылда пенсияға сыға. Хаҡлы ялда ла ҡул ҡаушырып ултырмай – 20 йылдан ашыу Рәсәй Федераль именлек хеҙмәтенең Башҡортостан буйынса идаралығының ветерандар ойош­маһы Советында яуаплы секретарь була. Бынан тыш, йәмәғәт тормошонда ла әүҙем ҡатнаша, илһө­йәрлек сараларында сығыш яһай. Йәштәрҙе илебеҙҙең данлы тарихы менән таныштыра, үҫеп килгән быуын күңелендә Ватанға һөйөү тәрбиәләүгә ҙур өлөш индерә.

Кашшаф Сәмиғуллин 42 дәүләт һәм 34 ведомство наградаһына лайыҡ була, Бөтә Рәсәй ветерандар ойошмаһы, шулай уҡ Рәсәйҙең һуғыш ветерандары һәм хәрби хеҙмәт комитетының Почет билдәләре менән бүләкләнә.

Ветерандың наградалары бик күп, әммә Кашшаф Әһлетдин улы өсөн Миңлеғәле Шайморатов ордены айырыуса яҡын.

Башҡортостан үҙенең Кашшаф Сәмиғуллин кеүек улдары менән лайыҡлы ғорурлана.

- Рәмилә МУСИНА

Читайте нас: