Хеҙмәттәре баһалап бөткөһөҙ

Төбәктә тиҫтә йылға яҡын бил­дәле “Уралтау” пред­прия­тиеһы райондағы бер нисә хужалыҡты үҙенә берләштерә. Етәкселәре уңған, эшселәре тырыш, хеҙмәт хаҡы ваҡы­тында түләнә. Шуға күрә йәш белгестәр ҙә бында килергә атлығып тора. Әйткәндәй, ошонда эш урыны тапҡандар араһында йәштәр күберәк.

“Уралтау” заманында бөл­гөн­лөккә төшкән “Урал” колхозы нигеҙендә ойошторолған. Әлбит­тә, уны ҡабаттан тергеҙеү өсөн эшҡыуар Таһир Зариповҡа күп көс һәм аҡса сарыф итергә тура килә. Хатта сит илдәр, башҡа төбәктәр тәжрибәһен дә өйрәнеп ҡайта етәксе. Һөҙөмтә ҡыуан­дыра – бөгөн предприятие йылдам үҫешә, төньяҡ-көнсығыш төбәктә иң эре хужалыҡтар иҫәбендә.

Бер аҙҙан хужалыҡҡа элекке “Рәсәй” колхозы ҡушыла, бөгөн унда сусҡа комплексы ла эшләй.

“Уралтау”ҙа әле ике мең баштан ашыу һыйыр малы аҫрала, сусҡа, һарыҡ һәм йылҡы тоталар. Хужалыҡ ит эшкәртеүҙе яйға һалған. Заманса ит комбинатында төрлө ярымфабрикаттар, тиҫтәгә яҡын төр колбаса етештерелә. Әйткәндәй, ит комбинаты бөтә санитар талап­тарға ла яуап бирә, хеҙмәт­кәр­ҙәрҙең эшен еңеләйтеү маҡса­тында һәр цехта заманса һәм ҡеүәтле ҡорамалдар урын­лаштырылған.

– Халыҡ беҙҙең продукцияны яратып һатып ала, хатта ҡайһы саҡ етмәй ҙә ҡала, – ти генераль директор Заһир Таһир улы Зарипов. – Етештерелгән ит аҙыҡ­тары йәмғиәттең сауҙа нөктә­ләренә һатыуға сығарыла. Бынан тыш, күрше өлкәләрҙә лә продукцияға ихтыяж ҙур.

Шулай уҡ ит комбинаты сус­ҡа, йылҡы һәм һыйыр итен дә һа­тыуға сығара. Әйткәндәй, бын­да иттең хаҡы түбән, уны күрше райондарҙан да килеп алалар.

Әлбиттә, малсылыҡта бындай уңышҡа үҙ эшен еренә еткереп башҡарғандарҙан тыш өлгәшеп булмай. “Уралтау”ҙа тап шун­дайҙар эшләй ҙә инде. Етәкселек хатта кемделер айырып бил­дә­ләргә теләмәй, “һәр береһе маҡ­тауға лайыҡ, ундай тырыштар менән тау аҡтарырға ла була”, ти.

Дыуан районы.