Үҙҙәренә ҙурыраҡ зыян килтерәләр

Бөгөн Башҡортостан Хөкүмәте Премьер-министры Андрей Назаров социаль селтәрҙәрҙә пост ҡалдырҙы.

“Францияла һайлау һөҙөмтәләре шуны күрһәтте – Эмманюэль Макрондың еңеүенә ҡарамаҫтан, тауыш биреүселәрҙең 40 проценттан ашыуы Марин Ле Пенға тауыш бирҙе. Икенсе төрлө әйткәндә, Рәсәй менән мөнәсәбәттәрҙе яйға һалыу өсөн сығыш яһанылар. Кисә беҙ 12 ил вәкилдәренән ошондай уҡ мәғлүмәт ишеттек.

Мәскәүҙә сит ил бизнесы башланғысы буйынса дүрт сәғәткә яҡын дәүләт власы вәкилдәре, йәмәғәт эшмәкәрҙәре, журналистар һәм эксперттар менән бергә һуңғы ике айҙа Рәсәйгә ҡаршы индерелгән санкцияларҙың донъя иҡтисадына йоғонтоһон тикшерҙек.

Франция-Рәсәй диалогы өсөн Европа парламенты депутаты Тьери Мариани ҙа үҙ фекерен белдерҙе. Хөкүмәт белдереүҙәренән тыш, француздар Рәсәй менән мөнәсәбәттәр үҫешен хуплай һәм барыһының да үҙгәреүен теләй. Мариани әфәнде “Өфө диалогы” халыҡ-ара платформаһын булдырырға тәҡдим итте, унда төрлө илдәрҙән бизнес һәм сәйәсмәндәр вәкилдәре инәсәк.

Был идеяны “МакроЭдвайзер” компанияһын ойоштороусыларҙың береһе Кристофер Уифер хупланы. Ул шулай уҡ халыҡ-ара эш төркөмөн булдырыу кәрәклеге хаҡында ла әйтте. Даими көсәйтелгән санкцияларға ҡарамаҫтан, Рәсәй иҡтисады уға ҡаршы санкциялар ҡулланған башҡа илдәргә ҡарағанда күпкә аҙыраҡ баҫым аҫтында, сөнки Рәсәйҙең тышҡы бурысы 50 миллиард долларҙан түбәнерәк, был 10 проценттан кәмерәк эске тулайым продукт һәм донъяла бишенсе иң аҙ күрһәткес, тип белдерҙе ул.

Дискуссиялар барышында санкциялар Европа илдәре һәм өсөнсө донъя илдәре иҡтисадына шулай уҡ зарарлы йоғонто яһауы асыҡланды.

Евразия халыҡтары ассамблеяһының генераль секретары Андрей Бельянинов күҙлегенән ҡарағанда, Европала барған хәл хәҙер Рәсәйгә ҡарағанда үҙҙәренә көслөрәк бәрелә: “Европа иҡтисады тип аталған ҡыуыҡ шартланы, уны хатта аппендицит тип тә атарға мөмкин. Әле артыҡ бер ни ҙә булманы, ә паника, көрсөк күренештәре, тулҡынланыуҙар башланды ла”.

Атап әйткәндә, Германияла Бундестаг депутаты Штефан Койтер һүҙҙәренсә, санкциялар индереү сәйәсәте Европаға Американан ишара тип аңлайҙар.

Рәсәйгә ҡаршы пропаганда эшен Америка һәм Рәсәй журналисы Тим Керби, шулай уҡ төбәк парламенты депутаты Венето Стефано Вальдегамебери билдәләп үтте.

Әммә, шуға ҡарамаҫтан, сит ил бизнесы Рәсәй менән мөнәсәбәттәрен өҙөргә теләмәй. Италия, Сербия, Венгрия, Австрия үҙ эшен дауам итергә әҙер.

Австрия бизнесмены, Buben & Zorweg компанияһына нигеҙ һалыусы Харольд Бубен белдереүенсә, уға Венаның Мәскәүгә ҡарата “дуҫ булмау” сәйәсәтен аңлауы ауыр. Уның һүҙҙәренсә, Рәсәй санкциялар шарттарында һис еңелмәйәсәк, ә үҙенең иҡтисади бойондороҡһоҙлоғон ғына күтәрәсәк. Ә Австрия бизнесы “Өфө диалогы”на сығырға әҙер.

Шуны ла билдәләп үтеү мөһим, “Өфө диалогы”н булдырыу идеяһын башҡа ҡатнашыусылар кеүек үк, Рәсәй Дәүләт Думаһының Иҡтисади сәйәсәт буйынса комитеты ла хупланы, ә Стратегик асыштар үҙәге шунда уҡ ҡушылырға әҙер булыуы хаҡында белдерҙе.

Фото: "Бәйләнештә".