Йә балағыҙ һәләк була, йә кемделер имгәтә, ғәйепләнеүселәр эскәмйәһенә ултыра...

Өфөлә “Рәсәй” медиаүҙәгендә юлдарҙа балалар йәрәхәте мәсьәләһе буйынса матбуғат конференцияһы үтте. Балаларҙың йәйге каникулы ваҡытында был тема айырыуса мөһим, көнүҙәк булып ҡала.

Спикерҙар питбайк ҡулланыу осраҡтарының фажиғәләре сәбәптәре, идара итеүҙә хәүефһеҙлек талаптары, тәртип ҡағиҙәләре һәм ваҡиғаларҙы иҫкәртеү саралары тураһында һөйләне. Белгестәр ата-әсәләргә һәм уҡытыусыларға балаларҙы хәүефтән һаҡларға ярҙам итәсәк төп ҡағиҙәләр менән уртаҡлашты.

Республиканың Дәүләт автоинспекцияһы начальнигы Владимир Севастьянов белдереүенсә, балалар һәм үҫмерҙәр тормош тәжрибәһе булмауы сәбәпле юл хәрәкәте өлкәһендә етерлек белемгә эйә түгел. Бынан тыш, водителдәрҙең ҡағиҙәләрҙе йыш боҙоуы һәм яуаплылыҡтарының түбән булыуы ла күҙәтелә.

–2025 йылда республика юлдарында юл-транспорт ваҡиғаларында һәләк булған балалар һаны, 2024 йыл менән сағыштырғанда, 41,7 процентҡа артҡан. Йыл һөҙөмтәһе буйынса республика тәүге биш төбәк исемлегендә тора, шулай уҡ механик транспорт сараларында водитель булған бәлиғ булмаған биш бала һәләк булған. Быйыл 1 июнгә ҡарата 16 йәшкә тиклемге балалар ҡатнашлығында 112 авария теркәлһә, уларҙа өс бала һәләк булды, 121-һе йәрәхәт алды, тип белдерҙе Владимир Севастьянов.

– Скутерҙар, мопедтар һәм питбайктар, авария хәлендәге иҫке еңел автомобилдәр үҫмерҙәр араһында бик популяр, һәм уларҙың һаны юлдарҙа йылдан-йыл арта. Был өлкәндәрҙең мауығыуҙарын файҙаланыу эҙемтәләре иң фажиғәле булыуы ихтимал. Бөгөнгә ҡарата 21 юл-транспорт ваҡиғаһы теркәлде, уларҙа 25 бәлиғ булмаған бала төрлө ауырлыҡтағы йәрәхәттәр алған, бер кеше һәләк булды, – тине Дәүләт автоинспекцияһы етәксеһе.

Башҡортостан буйынса Эске эштәр министрлығы ҡарамағындағы Йәмәғәт советы рәйесе урынбаҫары Наил Ишморатов балаларына мини-мотоциклдар һатып алған өлкәндәргә ҡаты иҫкәртеү менән мөрәжәғәт итте.

– Беҙгә нимә ҡала? Был хаҡта һөйләргә кәрәк. Ниһайәт, бәлки, ата-әсәләргә, үҫмерҙәргә лә барып етер, питбайк – уйынсыҡ түгел. Әгәр ата-әсәләр питбайк рәүешендә бүләк яһаһа, бигерәк тә асҡыс бирһәләр һәм уларҙы юлға сығарһалар, бер кәңәш – телефонды үҙегеҙ менән алып ултырығыҙ, моргтан йәки полициянан шылтыратыу көтөгөҙ. Йә балағыҙ һәләк була, йә кемделер имгәтә, ғәйепләнеүселәр эскәмйәһенә ултыра, – тип белдерҙе Наил Ишморатов.

Рәмилә МУСИНА фотоһы.