Дан бульвары яңы төҫ ала

Өфө ҡалаһы хакимиәтенән хәбәр итеүҙәренсә, баш ҡалалағы Дан бульварында бер айҙан ашыу эш ҡайнай. Объект  Рәсәй Президенты Владимир Путиндың май указы менән раҫланған “Торлаҡ һәм ҡала мөхите” милли проектының (национальный проект “Жилье и городская среда) “Уңайлы ҡала мөхите булдырыу” төбәк программаһына ярашлы төҙөкләндерелә. Ял зонаһы Өфөнөң 450 йыллығы һәм данлыҡлы осоусы, ике тапҡыр Советтар Союзы Геройы Муса Гәрәевтең тыуыуына 100 йыл тулыу айҡанлы яңыртыла.

Эш 1,12 гектар майҙанда бара. Уның заказсыһы – баш ҡала хакимиәтенең Капиталь төҙөлөш идаралығы, подряд ойошмаһы – “Потенциал” компанияһы.

Компания директоры Эдуард Остапчук әйтеүенсә, әле иҫке юл япмаһы тулыһынса ҡырып алынған, үҫемлек ҡатламы ситкә сығарыла, ҡом-ҡырсынташ ҡатнашмаһы түшәлгән. Эшселәр гранит таштан бордюрҙар ҡуялар, тротуар плитәһе түшәйҙәр. Бынан тыш, яҡтыртҡыс бағаналар өсөн ер аҫты коммуникациялары һәм видеокүҙәтеү системаһы үткәрелгән.

– Объектҡа 10-12 машина һәм 20-гә яҡын эшсе йәлеп ителгән. Графиктан бер аҙ алдараҡ барабыҙ. Эштең беренсе сиратын июль уртаһында тамамларбыҙ, икенсеһен иһә – өсөнсө кварталда, – тине подрядсы. – Юлға түшәлгән плитәләргә осоу-ултырыу һыҙатын сағылдырған яҡтыртҡыстар ҡуйыу проекттың төп үҙенсәлеге буласаҡ.

Яңыртылған Дан бульварында йәйәүлеләр майҙаны, уңайлы тротуарҙар, киң юлдар, балалар өсөн бәүелсәктәр, спорт зонаһы, стритфуд киосктары барлыҡҡа киләсәк. Ике яҡлап, ихаталарҙа балалар һәм спорт майҙансыҡтары йыһазландырыла. Тәртипте 27 видеокамера күҙәтәсәк. Бында шулай уҡ 57 эскәмйә ҡуйыу, 10 йүкә ағасы һәм 2900 ҡыуаҡ ултыртыу, 4,5 мең квадрат метрҙан ашыу газон түшәү күҙаллана.

Әйткәндәй, “Уңайлы ҡала мөхите булдырыу” программаһы нигеҙендә Өфөлә Георгий Мушников урамы һәм Йылы күл янындағы биләмә лә төҙөкләндерелә. Был проект уҙған йылдың көҙөндә, Дан бульвары менән бер рәттән, ҡала халҡының иң күп тауышын йыйғайны.

#ВладимирПутин
#национальныепроекты#нацпроекты
#региональныепроекты#регпроекты#нацпроектыБашкортостан

Фото: ufacity.info/press

Сығанаҡ: https://srk.nationalpriority.ru/press_releases/282591