Күкрәк һөтөнән дә файҙалыраҡ ризыҡ юҡ

Европаның 22 илендә түбән кластарҙағы мәктәп уҡыусыларының һаулыҡ торошон өйрәнгәндән һуң, 13,7 миллион баланың 400 меңе һуңғы сиктәге һимереүҙән яфаланыуы асыҡланған, ә артыҡ ауырлыҡ һәр бишенсе балала теркәлгән. Асыҡланыуынса, бер ваҡытта ла күкрәк һөтө менән туҡланмаған балалар был сиргә бигерәк тә тиҙ бирешә.

Дөйөм алғанда, сабый саҡта балаларҙың 77 процентына күкрәк һөтөн имеҙгәндәр. Был исемлеккә Ирландия инмәй: баҡһаң, был дәүләттә бәләкәстәрҙең 46 проценты әсә һөтөнән мәхрүм. Францияла ошо күрһәткес – 38 процентҡа, Мальтала 35 процентҡа тиң.

Белгестәр иҫкәртә: бала күкрәк һөтөн ни тиклем оҙағыраҡ имә, ул шул тиклем һимереүҙән, артыҡ ауырлыҡтан һаҡлана. Әсәйҙәргә баланы алты айға тиклем имеҙергә, артабан өҫтәмә туҡланыу индерергә, күкрәк һөтө менән иһә ике йәшкә һәм унан да күберәк имеҙергә тәҡдим ителә.