Күҙҙәрегеҙҙе һаҡлағыҙ...

Күреү һәләтен яҡшыр­тырға түбәндәге ысул да файҙалы. Ҡағыҙға баҫты­рылған тексты ҡулға тотоп, әкрен-әкрен (хәрефтәр танылмай башлағансы), күҙгә яҡын килтерегеҙ. Был ваҡытта күҙ мускулдары көсөргәнешле хәлгә килә. Ҡарашты айырмайынса, тексты ҡул һуҙымы тиклем араға йырағайт­ҡан­да, улар йомшара. Күнегеү 2-3 минут дауамында бер нисә тапҡыр яһала. Әгәр гел бер урынға – китапҡа йәки экранға ғына текәлеп ултырһаҡ, хрусталикты әйләндереп алған мускулдар хәлһеҙ­ләнә һәм көсһөҙләнә, әйбер­ҙәрҙең һүрәте тоноҡлана. Бындай хәл булмаһын тиһәгеҙ, күҙ мускулдарын эшләтергә кәрәк.

Күҙҙәр арымаһын өсөн тағы бер нисә кәңәште иҫтә тотоғоҙ.

Дөрөҫ яҡтыртығыҙ. Иң яҡшыһы – ике яҡтылыҡ сы­ға­нағы ҡулланыу. Бе­реһе өҫкө – дөйөм, бөтә бүлмәгә тарала торған яҡтылыҡ булһа, икенсеһе уҡығанда ҡабыҙыла торған лампочка булһын.

Күҙҙәрҙе ял иттерегеҙ. Ҡараңғы бүлмәлә йоҡла­ғыҙ. Тәҙрәнән урам уттары күренеп торһа, ҡалын ҡор­ған ҡороғоҙ. Йоҡо бүлмә­һендә телевизор бар икән, уның диодын төнгә һүн­дереп (йәки берәр нәмә менән ышыҡлап) ҡал­ды­рығыҙ. Яҡты ут нөктәһе күҙҙәрҙе ярһыта.

Витаминдар хаҡында онотмағыҙ. А витамины балыҡ майында һәм майлы диңгеҙ балығында бар. Е витамины сәтләүектә, күрәгәлә һәм көнбағышта күп. Зеаксантин һәм лютеин – катаракта барлыҡҡа килеүгә ҡаршы тороусы буяғыстар. Улар йәшел төҫтәге йәшелсәләрҙә (шпинат, брюссель кәбеҫтәһе, брокколи) шаҡтай күп.