"Башҡортостан һәр йәһәттән дә алдынғы"

Уҙған йомала Өфөлә Рәсәй Президенты Владимир Путин менән Башҡортостан Башлығы Радий Хәбиров осрашты. Республикалағы 2022 йылғы социаль-иҡтисади үҫеш йомғаҡтары тураһында һөйләшеү булды, шулай уҡ ошо тармаҡтарҙағы стратегик төбәк проекттары тураһында фекер алыштылар. 

– Матәм көнөндә осрашабыҙ – республиканың беренсе Президенты Мортаза Ғөбәйҙулла улы менән бәхилләштек, – тине Владимир Путин. – Мортаза Рәхимовты шәхсән бик яҡшы белдем. Беҙҙең арала яҡшы мөнәсәбәттәр булды. Ул Рәсәй Федерацияһы субъекты сифатында республиканың үҫешенә тос өлөш индерҙе, аҡыллы милли сәйәсәт алып барҙы, тотош ил тормошонда әүҙем ҡатнашты, иң һынылышлы осорҙа мөһим роль уйнаны. Был – уның ҙур хеҙмәте.

Владимир Путин билдәләүенсә, республика Мортаза Рәхимов етәкселегендә үҫеште, Советтар Союзы тарҡалғандан һуң аяҡҡа баҫты, күпкә өлгәште. Рәсәй Президенты Мортаза Ғөбәйҙулла улының яҡындарының, республика етәкселегенең һәм барлыҡ Башҡортостан халҡының ауыр ҡайғыһын уртаҡлашты.

– Тағы ла бер тапҡыр ҡабатлайым: ул етәкселек иткән осорҙа ифрат күп эш башҡарылды, – тине Владимир Путин. – Бөгөн дә республика яҡшы тиҙлектә алға бара. Һеҙҙә бөтә төп йүнәлештәр буйынса ла күрһәткестәр ыңғай. Эске тулайым төбәк продукты үҫә, сәнәғәт етештереүендә лә, ауыл хужалығында ла яҡшы яҡҡа үҙгәрештәр күп, эшһеҙлек буйынса Рәсәйҙә иң түбән күрһәткес. Төп капиталға инвестициялар дөйөм ил күрһәт­кесенән юғары, был – киләсәктә республиканың тотороҡло үҫешеренә ныҡлы гарантия. Һеҙгә, барлыҡ командағыҙға, Башҡортостан халҡына рәхмәт, артабан да уңыштар теләйем.

Владимир Путиндың һүҙҙәренә ҡарағанда, шул уҡ ваҡытта һорауҙар ҙа юҡ түгел. Тирә-яҡ мөхит иғтибар талап итә, һаулыҡ һаҡлауҙың бер тармағы булған “Ашығыс ярҙам” хеҙмәтен үҫтереү шуға асыҡ миҫал. Был юҫыҡта эшләргә кәрәк.  

– Хөрмәтле Владимир Владимирович, Мортаза Ғөбәйҙулла улын һуңғы юлға оҙатыуға килергә мөмкинлек тапҡанығыҙ өсөн һеҙгә ҙур рәхмәт, – тине Радий Хәбиров. – Беҙ уның менән, ысынлап та, ныҡ яҡын инек. Ул һәр саҡ һеҙгә хөрмәт менән ҡараны, Рәсәйҙең ысын патриоты булды.

Был беҙҙең өсөн ғорурлыҡ, әлбиттә, беҙҙең беренсе Президентыбыҙға оло хөрмәт күрһәттегеҙ.

Радий Хәбиров республика тормошоноң уҙған осорона ҡыҫҡаса йомғаҡ яһаны. Владимир Путин күрһәтмәһенә ярашлы, мөһим бурыстар билдәләнгән, был – иҡтисад тотороҡлолоғон тәьмин итеү.  

– Ябай булмаған 2022 йылды производство индексы буйынса үҫеш менән тамамланыҡ, – тине Радий Хәбиров. – Ауыл хужалығы тармағы буйынса ныҡлы үҫеш күҙәтелде, бөтә Рәсәйҙәге шикелле, беҙ ҙә мул уңыш алдыҡ. Иң мөһиме – производствоны үҙгәртеп ҡорҙоҡ. 2019, 2020, 2021 йылдарҙа йәки өс йыл эсендә беҙҙә инвестиция үҫеше 31 процент тәшкил итте. 2022 йыл буйынса ла үҫеш күҙәтелде, – тине Башҡортостан Башлығы.

Илдар АҠЪЮЛОВ