Йәштәргә рухи көс теләне

Юбилярҙы Башҡортостандың мәҙәниәт министры урынбаҫары Ранис Алтынбаев тәб­рикләп, Рәхмәт хатын тапшырҙы. Яҙыусылар союзы рәйесе урынбаҫары Рәшит Зәйнуллин, әҙиптең ижадына байҡау яһап, авторҙың публицистик фекерҙәре, башҡорт халҡының яҙмышына бәйле тәнҡит мәҡәләләре халыҡ араһында ҙур резонанс алыуын әйтте һәм бөтә ҡәләмдәштәре исеменән ҡотлау һүҙҙәрен еткерҙе.

Драматург Наил Ғәйетбай яҙыусының милли мәсьәләләргә иғтибарлы булыуын билдәләһә, сатирик Марсель Сәлимов тарихи темаларға яҙылған әҫәрҙәренең юғары маҡсатына һоҡланыуын әйтте. С. Юлаев премияһы лауреаты Ринат Камал ҡәләмдәшенең тыуған яғы, яҡташтары менән бәйләнеште өҙмәүен, шәжәрәләр төҙөүгә булышлыҡ итеүен маҡтап телгә алды. Яҙыусы Леонид Соколов өлкән әҙипкә ижади уңыштар теләне. М. Аҡмулла исемендәге Башҡорт дәүләт педагогия универ­ситетының өлкән уҡытыусыһы Азалия Ҡурам­шина, Әсләм Ислам улы тураһында телмәр тотоп, уның йәштәр менән бәйләнеш өҙмәүен, яҡташтарын ижади мөхиткә ылыҡтырыуын маҡтаны.

Өлкән ҡәләмдәшебеҙ Башҡортостан Яҙыу­сылар союзына Салауат Юлаевтың скульп­тураһын бүләк итеп: “Уның кеүек батыр рухлы, көслө, ысын патриоттар булығыҙ!” – тип теләне. Сараны М. Аҡмулла исемендәге Башҡорт дәүләт педагогия университеты студенттары йыр-моң, бейеүҙәре менән биҙәне. Ҡатыны Лира ханым, ҡыҙҙары яҡын кешеләренә булған ихтирам өсөн сикһеҙ ҡыуанды, сараны ойош­тороусыларға рәхмәт әйтте. Әйткәндәй, яҙыу­сының яҡташтары Силәбе, Свердловск өлкә­ләрендә Әсләм Арыҫлановтың юбилей сараларын үткәрергә йыйына.