Ремонт өсөн аҡса бүленәсәк

Төньяҡ-көнсығыш төбәктәге биш райондан 100 уҡыусы һынау тота унда. Эш сәфәре барышында республика етәксеһе Радий Хәбиров улар менән аралашты, уңыштар теләне.

Спорт мәктәбенең шахмат клубы тренеры Имаметдин Бәширов әйтеүенсә, бында алтмыш бала шөғөлләнә, араларында республика турнирҙарында уңыш ҡаҙанғандар бар.

Радий Хәбиров спорт һәм тренажер залдарын, төньяҡ-көнсығыш төбәктә берҙән-бер һаналған йөҙөү басссейнын ҡараны. Мәктәп директоры Александр Уразаев һүҙҙәренсә, бында спорттың ун төрө менән шөғөлләнәләр. Биш йөҙҙән ашыу бала йөрөй. Барыһы ла бушлай, тик каратэ секцияһына ғына айына 900 һум түләйҙәр.

“Иң мөһиме – туплаған оҫталығығыҙҙы үҙегеҙҙе, яҡындарығыҙҙы, дуҫтарығыҙҙы яҡлау өсөн генә ҡулланығыҙ, спорт ярыштарында уңыштарға өлгәшегеҙ”, – тип теләне Радий Фәрит улы көнсығыш бергә-бер алышы менән шөғөлләнгәндәргә.

Мәктәп тәрбиәләнеүселәре араһында республика, Рәсәй, донъя чемпиондары бар.

Учреждение директоры республика етәксеһенән бинаны капиталь ремонтлауға ярҙам һораны – 17,8 миллион һум кәрәк. Радий Хәбиров урындағы власҡа был йәһәттән тейешле документтарҙы әҙерләргә һәм ремонтты башларға ҡушты. Республика бюджетынан кәрәкле аҡса бүленәсәк.