Бәйге алдынан “Рәсәйҙең ярыш аттарын үҫтереү дуҫлығы” коммерцияға ҡарамаған хеҙмәттәшлеге идараһы рәйесе Николай Исаков менән “Аҡбуҙат” йылҡысылыҡ һәм ат спорты буйынса компетенциялар үҙәге директоры Дамир Исеев “Терра Башҡортостан” ат сабыштарына арналған матбуғат конференцияһы уҙғарҙы.
– Һеҙҙең ипподром миңә бик оҡшай, – тине Николай Исаков. – Ҡазандағы, Краснодарҙағы һәм башҡа бер нисә ипподром менән бергә мин уны иң яҡшылар рәтендә тип беләм. Һеҙҙә фәҡәт күнекмәләр үҙәге асыу ғына етмәй.
Уның әйтеүенсә, ат спортының киләсәге ҙур, тик уға дәүләт яғынан иғтибар етеңкерәмәй әле. Мәҫәлән, халҡы һәм майҙаны буйынса Башҡортостан менән бер сама булған Финляндияла 43 ипподром уңышлы эшләп килә.
Беҙҙә лә ат спортын йылдан-йыл үҫтереүҙә, ипподромдар инфраструктураһын яҡшыртыуҙа алға китеш бар. Һуңғы өс йылда Башҡортостанда йылҡысылыҡ ҙур темптар менән үҫә. Әле республикала башҡорт тоҡомо аттарын үрсетеү буйынса ете тоҡомсолоҡ заводы эшләй. Башҡортостанда бөтәһе 120 мең баш ат иҫәпләнә.
Николай Исаков “Терра Башҡортостан” ат спорты турниры буйынса башланғыстың нисек барлыҡҡа килеүен, был йүнәлештәге саралар тураһында ентекләп һөйләне.
“Рәсәйҙең ярыш аттарын үҫтереү дуҫлығы” хеҙмәттәшлеге лә был әлеге ат спорты турнирын ойоштороу, уны башҡа төбәктәрҙә лә таратыу өсөн күп көс һалған. Ниһайәт, ул айырым бер матур йолаға әйләнеп бара, тине ул. Башҡортостандың муниципалитеттары араһында “Терра Башҡортостан”дың һәүәҫкәр һыбайлылары араһындағы бындай ат сабыштары 2018 йылдан алып үткәрелә. Быйыл турнир майҙа уҡ башланды һәм сентябргә саҡлы дауам итте. Финалға иң йылғыр ун һыбайлы сыҡты.
Матбуғат конференцияһында шулай уҡ, донъяның башҡа илдәрендәге кеүек, тотализатор системаһын ойоштороу кәрәклеге тураһында ла төрлө фекерҙәр әйтелде. Күп кенә илдәрҙә ул ат спортын финанслауҙа төп сығанаҡ булып тора икән. Мәҫәлән, Японияла тотализатор системаһы ошо спорт төрөн үҫтереүгә йылына 25 миллиард доллар бирә.
Матбуғат конференцияһынан һуң унда ҡатнашыусылар башҡа ҡунаҡтар һәм тамашасылар менән бергә “Терра Башҡортостан” турнирының финал өлөшөн ҡараны. Бында шулай уҡ Башҡортостан Башлығы призына ат сабыштары, Урта һәм Ҡара диңгеҙ һыбайлыларының халыҡ-ара чемпионатының III этабы үткәрелде.
- Рәшит КӘЛИМУЛЛИН.